Mapigano yaibuka mashariki mwa DRC, wakimbizi waongezeka

Mapigano mapya kati ya waasi wa M23 na jeshi la amhuri ya Kidemokrasia ya Kongo, likisaidiwa na wanamgambo wanaojulikana kamma Wazalendo, yamesababisha wakazi wengi kuyahama makazi yao katika maeneo kadhaa mashariki mwa Jamhuri ya Kidemokrasia ya Kongo.

Serikali ya Kongo na waasi wa M23 walikuwa wamesaini hivi karibuni makubaliano ya amani mjini Doha, chini ya usuluhishi wa Qatar. Hata hivyo, siku ya Alhamisi mapigano yalizuka katika maeneo mbalimbali ya jimbo la Kivu Kaskazini, ikiwemo Kibati katika eneo la Walikale, Kinyumba, na Nyabiondo katika eneo la Masisi.

Vyanzo vya habari viliripoti Ijumaa kuwa mapigano hayo yalianza baada ya vikosi vya serikali kushambulia ngome za waasi huko Kinyumba. Jeshi la DRC lilitumia ndege ya kivita kushambulia ngome za waasi katika Kibati, Walikale, Kasopo na Masisi.

Ripoti za vyombo vya habari zilisema waasi walifanikiwa kutwaa mji wa Mahanga katika eneo la Masisi kufuatia mapigano ya wiki hii.

Vianney Kitswamba, mratibu wa ulinzi wa usalama katika Masisi, aliwathibitishia waandishi wa habari kuwa hali ya usalama imeendelea kuwa tete katika vijiji kadhaa vya jimbo la Kivu Kaskazini. Alisema wilaya kadhaa zimesalia tupu: “Kwa kuogopa usalama wao, baadhi ya familia zimekimbia makazi yao, ilhali walikuwa wamerejea hivi karibuni.”

Wakati huohuo, zaidi ya watu 22 waliripotiwa kupigwa risasi na kuuawa kikatili katika Irhambi Katana, eneo la Kabare, jimbo la Kivu Kusini, usiku wa Novemba 23 hadi 24, kufuatia mapigano kati ya vikundi vya kujilinda na waasi wa M23, jeshi lilikiri. Waathirika, wenye umri kati ya miaka 20 na 40, walidaiwa kushutumiwa kwa kushirikiana na kundi la Wazalendo.

Umoja wa Mataifa, serikali ya DRC na wadau wengine wanailaumu Rwanda kwa kuunga mkono waasi wa M23, madai ambayo Kigali imeyakanusha.

Taasisi ya Utafiti ya Ebuteli ya Kongo ilibainisha katika ripoti yake ya mwezi huu kuwa makundi ya ADF na M23 yalikuwa miongoni mwa yenye ukatili zaidi mwezi Oktoba nchini humo.

Ujumbe wa Umoja wa Mataifa wa Kudumisha Amani nchini Kongo (MONUSCO) ulisema mashambulizi ya kikatili yaliyofanywa na ADF katika maeneo kadhaa ya Kivu Kaskazini kati ya Novemba 13 na 19 yaliua watu wasiopungua 89.