Rais Raisi: Iran ya leo imeendelea na ni ya teknolojia

Kwa mujibu wa Shirika la Utangazaji la Jamhuri ya Kiislamu ya Iran IRIB, Seyed Ebrahim Raisi, aliyasema hayo jana Ijumaa katika sherehe za ufunguzi wa kiwanda cha Zamzam 3 cha Kampuni ya Feleji ya Khuzestan kilichoko kusini-magharibi mwa Iran na akabainisha kuwa: "leo vita vilivyopo ni vita vya irada na matakwa; na adui hataki Iran istawi na kuendelea, lakini wananchi wamepata ushindi katika vita vya irada kutokana na kustawisha uchapaji kazi, uzalishaji na uandaaji wa ajira".

 

Raisi ameeleza: "leo katika mkoa wa Khuzestan, tunashuhudia kuanza kazi kwa miradi muhimu ya kiuchumi ambayo imefanikishwa na wataalamu, mafundi, washauri na wafanyakazi wa ndani ya Iran".

Rais wa Jamhuri ya Kiislamu ya Iran amesema kiwanda cha Zamzam 3 cha Kampuni ya Feleji ya Khuzestan kimejengwa na kuzinduliwa kwa kushirikisha makampuni 115 ya ubunifu wa utaalamu na makampuni zaidi ya 50 ya viwanda vya ndani bila kujumuisha wataalamu wa kigeni na akaongeza kuwa, tani milioni mbili za chuma cha sponji zinazalishwa nchini Iran; na katika uwanja huo, Iran ya Kiislamu inashika nafasi ya kwanza katika eneo hili na ya pili duniani; na hiyo ni heshima kubwa.