Wanafunzi wa Iran wang'ara katika Mashindano ya Hisabati ya Marekani

Wanafunzi wa Iran washinda dhahabu na fedha katika Mashindano ya Hisabati ya Marekani (AMO) ya mwaka huu wa 2025.

Mkurugenzi Mkuu wa Elimu wa Mkoa wa Khuzestan, Nasser Alifar, ametangaza kuwa Soroush Rojhanpour, mwanafunzi wa darasa la tisa, na Kasra Shirani, mwanafunzi wa darasa la saba, wameibuka washindi wa medali ya dhahabu na fedha mtawalia katika mashindano hayo.

Ameongeza kuwa washindi hao wawili wanasoma katika shule ya sekondari ya mji wa Ahvaz. Alifar alisema: “Nawapongeza wanafunzi hawa na wazazi wao, pamoja na mkuu wa shule na walimu wa Shule ya Upili ya Shahid Beheshti-1. Natumai wanafunzi wa Mkoa wa Khuzestan wataendelea kupanda vilele vikubwa zaidi vya mafanikio.”

Mashindano ya Hisabati ya Marekani ni mashindano ya kimataifa kwa wanafunzi wa shule za msingi, za kati na za sekondari, yanayoandaliwa kwa pamoja na Kituo cha Mashindano ya Umahiri cha Kimataifa cha Singapore (SIMCC) na Chuo Kikuu cha Kusini Illinois Carbondale (SIU).

Mashindano haya yako wazi kwa wanafunzi wa darasa la pili hadi la kumi na mbili, na yanalenga kuhimiza umuhimu na uelewa wa kina wa hisabati.

Mnamo Julai, timu ya taifa ya Iran ya hisabati iling’aa katika Mashindano ya 66 ya Kimataifa ya Hisabati yaliyofanyika Australia, ikishinda medali mbili za dhahabu, tatu za fedha na moja ya shaba.