Shambulio la utawala wa Kizayuni huko Damascus, Syria

Mtu mmoja ameuawa na wengine watatu kujeruhiwa katika shambulio la jeshi la Kizayuni huko Damascus, mji mkuu wa Syria.

Kwa mujibu wa Shirika la habari la IRNA, mashambulizi ya utawala wa Kizayuni dhidi ya Syria yaliyotekelezwa leo asubuhi kutokea eneo la milima ya Golan inayokaliwa kwa mabavu na utawala haramu wa Israel huko Syria yalilenga vituo vya kijeshi kusini mwa Damascus, pamoja na nyumba ya makazi katika eneo la Kafr Sousa mjini humo.

Ulinzi wa anga wa Syria ulinasa na kuharibu idadi ya makombora yaliyorushwa na utawala huo ghasibu.

Katika miaka ya hivi karibuni, utawala wa Kizayuni umekuwa ukifanya mashambulizi ya anga ya mara kwa mara dhidi ya mji wa Damascus na mikoa mbalimbali ya Syria,  mashambulizi ambayo mara nyingi yamekuwa yakikabiliwa na ulinzi wa anga wa Syria na kufanywa yasiwe na taathira kubwa dhidi ya nchi hiyo.

Mashambulizi ya anga ya utawala wa Israel dhidi ya Syria yanaendelea, huku Damascus mara kadhaa ikituma barua za malalamiko kwa Umoja wa Mataifa na Baraza la Usalama la umoja huo, ikiyalaani na kutaka yasimamishwe mara moja.