Barabara Ndefu Zaidi ya Chini ya Bahari Duniani Kuunganisha Iran na Qatar

Amiri wa Qatar, Sheikh Tamim bin Hamad Al Thani, aliyekuwa ziarani mjini Tehran wiki iliyopita, alisisitiza mpango wa pamoja kati ya nchi yake na Iran wa kuchimba njia ya chini ya Bahari katika Ghuba ya Uajemi, ambayo itaunganisha Iran na Qatar.

Mradi huu wa kipekee pia unatarajiwa kuongeza muunganisho kati ya Asia ya Magharibi, Bahari ya Kaspi, na Bahari ya Mediterania.

Wazo la kujenga njia hii ya chini ya bahari, inayotarajiwa kuwa ndefu zaidi duniani, lilijadiliwa kwa mara ya kwanza wakati wa ziara ya aliyekuwa Rais wa Iran, shahidi Ebrahim Raeisi, nchini Qatar mnamo Februari 2022. Wakati huo, ilielezwa kuwa mradi huo ungeanza tu baada ya kamati ya pamoja ya Qatar na Iran kukamilisha tafiti na mazungumzo kuhusu mpango huo.

Katika mkutano wake na Kiongozi Muadhamu wa Mapinduzi ya Kiislamu, Ayatullah Seyyed Ali Khamenei, Amiri wa Qatar alisema kuwa kamati ya mradi huo itaanza kufanya kazi hivi karibuni, jambo linaloashiria jinsi Qatar ilivyo makini katika kufanikisha mpango huu mkubwa.

Njia hiyo ya chini ya bahari inatazamiwa kujumuisha barabara ya magari na malori, pamoja na reli. Itaanzia kaskazini mwa rasi ya Qatar na kutanuka kwa takriban kilomita 190 kuelekea pwani ya Iran, karibu na eneo la Dayyer. Njia hii itakuwa takriban mara tatu ya njia ndefu zaidi ya chini ya bahari iliyopo kwa sasa nchini China, yenye urefu wa kilomita 68 kwenye mtandao wa metro ya Chengdu.

Aidha, njia hiyo itakuwa mara tano ya urefu wa njia ya chini ya bahari inayounganisha Ufaransa na Uingereza kupitia Channel Tunnel, yenye urefu wa kilomita 38.

Kwa Qatar, ujenzi wa njia hii ya chini ya bahari utakuwa mafanikio makubwa, kwani ni fursa ya kufikia masoko ya Eurasia kupitia Iran. Kama ilivyo kwa nchi nyingine za Kiarabu, Qatar—licha ya kuwa ndogo lakini yenye utajiri mkubwa—inategemea njia ya ardhi kupitia Saudi Arabia ili kuunganishwa na sehemu nyingine za dunia.