UNICEF: Ulimwengu hauchukui hatua za kweli kuokoa Gaza

 Mfuko wa Watoto wa Umoja wa Mataifa (UNICEF) umetangaza kuwa, ulimwengu hauchukui hatua za kweli kuokoa Gaza.

Taarifa ya UNICEF imesema kuwa, hali katika mji wa Gaza na katika Ukanda wote wa Ukanda huo ni mbaya sana, bila chakula au dawa, na mbaya zaidi, watu wanajua kwamba hakuna msaada wa kweli wa kimataifa kwao, na hali itazidi kuwa mbaya zaidi.

Kufuatia kuenea kwa janga la njaa katika Ukanda wa Gaza, maonyo ya kimataifa kuhusu mzozo wa kibinadamu katika ukanda huo yanaendelea kuongezeka, na Tess Ingram, msemaji wa Shirika la Umoja wa Mataifa la Kuhudumia Watoto (UNICEF), ameonya juu ya hali inayoongezeka ya njaa katika mji wa Gaza, na kusema kwamba ikiwa hatua za haraka hazitachukuliwa, hatari hii itaenea katikati mwa Ukanda wa Gaza ndani ya wiki chache.

 Msemaji wa UNICEF amesisitiza kuwa, hatari ya kuenea kwa njaa katika mji wa Gaza ni ya kweli na kwamba familia haziwezi tena kuwapa chakula watoto wao. Afisa huyo wa UNICEF ameongeza kuwa: "Hali ya Ukanda wa Gaza ni mbaya sana, na wakaazi wake, haswa mashariki na kaskazini mwa mji wa Gaza, wanaishi chini ya tishio la mara kwa mara na kuongezeka kwa mashambulizi ya Israel."

Kadhalika, msemaji wa UNICEF amesema: "Wasimamizi wa hospitali kote Gaza wanaripoti kuongezeka kwa idadi ya watoto wanaougua majeraha ya kuvunjika, kuchomwa moto na majeraha makubwa kutokana na mashambulizi ya Israel katika siku za hivi karibuni. Wakati huo huo, njaa inazidi kuenea na itafika katikati mwa Ukanda wa Gaza ndani ya wiki chache."