Matetemeko makubwa ya ardhi yaikumba Venezuela, makumi waaaga dunia

Matetemeko mawili makubwa ya ardhi yameikumba Venezuela siku ya Jumatano, na kusababisha uharibifu mkubwa katika mji mkuu Caracas na maeneo ya jirani.

Watu wasiopungua 32 wamefariki dunia na zaidi ya 700 kujeruhiwa, huku vikosi vya uokoaji vikiharakisha juhudi za kuwaokoa manusura waliokwama chini ya majengo yaliyoporomoka. Mamlaka zimeonya kwamba idadi ya vifo huenda ikaongezeka wakati operesheni za utafutaji na uokoaji zinaendelea.

Kwa mujibu wa Taasisi ya Jiolojia ya Marekani (USGS), tetemeko la ardhi la ukubwa wa 7.2 lilitokea takribani kilomita 160 magharibi mwa Caracas, kabla ya mtetemeko mwingine wenye nguvu zaidi wa ukubwa wa 7.5 kutokea chini ya dakika moja baadaye.

USGS ilitoa tahadhari yake ya kiwango cha juu zaidi, ikionya kwamba idadi ya vifo inaweza kufikia maelfu kutokana na ukubwa wa maafa hayo na udhaifu wa miundombinu katika maeneo yaliyoathirika.

Rais wa muda Delcy Rodríguez alitangaza hali ya dharura, akisema maeneo yaliyoathirika zaidi ni pamoja na jimbo la La Guaira, ambalo lina uwanja mkuu wa kimataifa wa ndege wa Venezuela, Reuters iliripoti.

Majengo mengi ya makazi na biashara yameporomoka, huku hospitali zikihudumia mamia ya watu waliojeruhiwa. Uwanja wa ndege wa Caracas umefungwa, shule zimesitishwa, na timu za uokoaji kutoka nchi kadhaa zinaandaliwa kusaidia juhudi za uokoaji.

Mitetemeko hiyo ya ardhi kwa muda mfupi ilisababisha tahadhari ya tsunami kwa baadhi ya maeneo ya Karibiani, ambayo baadaye ilifutwa baada ya uchambuzi wa ziada kufanyika.

Venezuela iko kwenye mpaka kati ya mabamba ya tektoniki ya Karibiani na Amerika Kusini, na imewahi kukumbwa na mitetemeko kadhaa mikubwa ya ardhi katika historia yake, ikiwemo tetemeko kubwa na la maangamizi la Caracas la mwaka 1812.