The Guardian: Trump ndiye adui nambari moja wa jamii ya kimataifa

Gazeti la Uingereza The Guardian limemuelezea Rais wa Marekani Donald Trump kuwa ndiye “adui wa nambari moja wa jamii ya kimataifa”, likikosoa sera na hatua zake katika masuala ya kimataifa.

Kwa mujibu wa gazeti hilo, hatua zinazochukuliwa na Trump zimeibua wasiwasi kuhusu mustakabali wa ushirikiano wa kimataifa, amani na utulivu wa dunia.

Kauli hiyo inaelezwa kuwa sehemu ya ukosoaji mkali dhidi ya sera za utawala wa Trump na namna anavyoshughulikia masuala ya kisiasa na kidiplomasia duniani.

Gazeti hilo la Uingereza limeeleza kuwa tabia ya kujiona bora kupita kiasi ya Donald Trump ndiyo adui nambari moja wa jamii ya kimataifa, likidai kuwa hali hiyo imemfanya kuwa mhusika hatari zaidi kuliko silaha ya maangamizi ya halaiki.

Simon Tisdall, mwandishi na mchambuzi mashuhuri wa gazeti la Uingereza The Guardian, ameandika kuwa, hatari kubwa zaidi inayoukabili ulimwengu haipo tu katika nguvu za maadui au asili ya migogoro, bali ipo katika “ukosefu wa mkakati ulio wazi wa kusimamia na kudhibiti majanga na migogoro.”

Tisdall amesema kuwa, kushindwa kuwa na mpango madhubuti wa kukabiliana na migogoro ya kimataifa kunaweza kuongeza hatari na kusababisha madhara makubwa zaidi duniani.

Mchambuzi huyo amesema kuwa Donald Trump amekuwa mhusika hatari zaidi katika mzozo wa Iran, akiamini kwamba namna anavyosimamia mgogoro huo kumeifikisha Marekani na dunia katika hali ngumu ya kisiasa, kiuchumi na kijeshi ambayo ni vigumu kujinasua.

Ameeleza kuwa mtindo wa uongozi na maamuzi ya Trump katika mzozo huo umeongeza changamoto na kuifanya njia ya kutoka katika hali hiyo kuwa ngumu zaidi.