Mali: Nakiya Ta Kashe Sojoji 10

Tashar talabiji din France24 ta ambato majiyar tsaron Mali tana cewa wata nakiya da aka dasa a bakin hanya ta tashi da motar sojojin kasar a yankin Dioura.

Majiyar sojan kasar ta Mali ta ci gaba da cewa: Nakiyar ta tashi ne dai adaidai lokacin da sojojin suke baro yankin na Dioura da suka yi fada da masu tsattsauran ra'ayi.

Wata majiyar ta daban ta ambaci cewa an kashe wasu karin sojoji shida a cikin wannan yankin na Dioura.

A cikin wani rahoto na dakarun tabbatar da zaman lafiya na Majalisar Dinkin Duniya a Mali, ya ambaci cewa a cikin kwanakin bayan nan ana samu karuwar kai hare-hare ta'addanci.

Da akwai dakarun tabbatar da zaman lafiya na Majalisar Dinkin Duniya 11,000 da suke a cikin kasar ta Mali tun 2013.