Dakarun Tsaron Iran Sun Hallaka 'Yan Ta'adda 5 A Yammacin Kasar

Dakarun Kare juyin juya halin musulinci na Iran sun hallaka 'yan ta'adda biyar tare da kame wasu 16 na daban a yammacin kasar

Wannan nasara na zuwa ne bayan da wani rahoto da Rundunar ta samu na shigowar wani gungu 'yan ta'addar IS mai dauke da mautane 21 daga yankunan yammacin kasar cikin kasar ta Iran.

A safiyar yau ne Dakarun juyin juya halin musulinci suka kai farmaki kan 'yan ta'addar tare da hallaka 5 daga cikin su tare kuma da cabke wasu 16 na daban.

A cikin wata sanarwa da dakarun kare juyin juya halin na sansanin Najab  suka fitar sun bayyana cewar a yayin wannan gumurzun tsakaninsu da 'yan ta'addar,  dakarun kare juyin sun sami nasarar hallaka 'yan ta'adda 5 da kuma cabke sauran 16 da suka  shigo kasar din daga yankunan yammacin kasar, suna masu sake jaddada aniyarsu na ci gaba da kare kasar Iran din daga duk wata barazanar da za ta iya fuskanta.