Dakarun Iraki na ci gaba da Dannawa yammacin Mausil

Dakarun sa kai na kasar Iraki sun samu nasarar tsarkaka wani kauye daga kewayen garin Tal'afar dake yammacin garin Mausil.

A ci gaba da farmakin da Dakarun kasar Iraki ke kaiwa na kwato yammacin Birnin Mausil, a wannan Laraba Dakarun sa kai sun samu nasarar kwato kauyen Harabul-Jahash dake kewayen garin Tal'afar, a yayin kai wannan farmaki Dakarun sa kai sun samu nasarar hallaka 'yan ta'addar ISIS da dama.

A bangare guda, Ministan tsaron kasar Iraki ya bayyana cewa Jiragen yakin kasar sun kai farmaki a arewa maso gabashin yankin Siniya tare da tarwatsa wata cibiya ta taruwar 'yan ta'addar IS, lamarin da ya yi sanadiyar hallakar wani adadi mai yawa daga cikin su tare kuma da tarwatsa motoci gami da baburan su.

Kungiyar Leken asiri da bincike ta kasar ta samu nasarar kutsawa cikin wuraren da 'yan ta'addar suke rike da shi a yammacin garin na Mausil tare da watsa Hotunan su a yankin.