Afganistan : Harin Taliban Ya Kashe Mutum 13

Rahotanni daga Afganistan na cewa mutane 13 ne suka rasa rayukansu a wani harin kunar bakin wake da wani dan Taliban ya kai da mota kan wani ayarin motocon soji a kudancin kasar.

Kakakin gwamnatin yankin, Omar Zwak ya shaidawa kamfanin dilancin labaren AFP cewa dan kunar bakinb waken ya aukawa ayarin motocin soji da mota shake da bama-bamai lamarin da ya rutsa da sojojin ksar da kuma fararen hula, da kuma raunana wasu mutane da dama.

Galibin dai wadanda suka mutu a harin sojojin kasar ta Afganistan ne a yayin da wadanda suka raunana farar hula ne a cewar wata majiyar asibiti.

Kungiyar Taliban ta aike da wani sakon watsapp ga wasu manema labarai cewa ita ce keda alhakin kai harin.

Wannan harin dai na zuwa ne kwanaki kadan bayan wani makamancinsa da ya yi sanadin ajalin wasu fararen hula hudu da kuma raunana daliban makaranta da dama a yayin da wani dan kunar bakin wake ya tayar da bama-baman da ya yi jigida dasu a harabar wani ofishin 'yan sanda a yankin na Helmand.