Sojojin Gwamnatin H.K.Isra'ila Sun Yi Awungaba Da Palasdinawa Masu Yawa

Sojojin gwamnatin haramtacciyar kasar Isra'ila sun kai farmaki kan yankunan da suke gabar yammacin kogin Jordan, inda suka kame Palasdinawa masu yawa.

Kafar watsa labaran Palasdinawa ta watsa rahoton cewa: Sojojin gwamnatin haramtacciyar kasar Isra'ila sun kai farmaki kan garuruwan Nablus da Khalil da kuma Baitu-Laham da suke gabar yammacin kogin Jordan, inda suka shiga gida-gida suna kame mutane.

Har ila yau sojojin na haramtacciyar kasar Isra'ila sun farma wasu kauyuka da suke yankunan gabar yammacin kogin Jordan da nufin kame Palasdinawa, inda aka samu bullar dauki ba dadi tsakaninsu da Palasdinawan tare da kame adadi masu yawa.