Sama Da Palastinawa 150 Suka Jikkata A Hanun Jami'an Tsaron Isra'ila

Jami'an tsaron Isra'ila sun jikkata Palastinawa sama da 150 a yankunan gabar yamma da kogin Jodan da birnin Qudus da Zirin Gaza.

Hukumar gidan radio da talabijin ta kasar Iran ta nakalto kungiyar bayar da agajin gaggawa ta Palastinu na cewa a jiya Lahadi jami'an tsaron isra'ila sun jikkata Palastinawa 157 a yankuna daban daban na gabar yamma da kogin Jodan da yankin iyaka da zirin gaza.

Tashar talabijin ta Al'alam ta nakalto wata majiyar Palastinu na cewa jami'an tsaron Isra'ila sun yi awon gaba da wani adadi na matasan Palastinawa a garin Alkhalil dake gabar yamma da kogin Jodan, har ila yau mahukuntan HKI sun kara  yawan jami'an tsaro a tsoffin anguwanin Baitul-Makdis.

Tun bayan sanarwar shugaban kasar Amurka Donald Trump na ayyana birnin Qudus a matsayin babban birnin Isra'ila, rikici ya barke tsakanin Palastinawa da jami'an tsaron haramtacciyar kasar Isra'ila.