Dakarun kasar Yemen Sun Hallaka Alal Akalla Sojojin Saudiyya Guda Tara

Sojojin kasar Yemen tare da daukin dakarun sa kai na kasar, sun sami nasarar hallaka alal akalla sojojin Saudiyya su 9, a wasu hare-haren mayar da martani da suka kai yankunan Jizan da Najran da suke kan iyaka da kasar Saudiyya da Yemen din.

Tashar talabijin din al-Masirah ta kasar Yemen din ta ce wata majiyar sojojin kasar Yemen din ta shaida mata cewa a wani hari da sojojin da suke samun daukin dakarun sa kai na kasar Yemen din suka kai yankin Al-Khobe da ke gundumar Jizan a yammacin jiya Alhamis, sun sami nasarar hallaka wasu sojojin Saudiyyan su takwas.

Har ila yau majiyar ta kara da cewa a  wani harin kuma na daban da sojojin na Yemen suka kai sansanin soji na Al-Shorfa da ke gundumar Najran shi ma a yammacin jiya Alhamis din, son sami nasarar hallaka wani sojan sari ka noke na Saudiyyan guda daya, kamar yadda kuma sun harba wani makami mai linzami samfurin Badr-1 cikin kamfanin man fetur na Aramco mallakin Saudiyya din da ke garin na Najran, sai dai har ya zuwa yanzu ba a tabbatar da irin barnar da makamin yayi ba.

Cikin 'yan kwanakin nan dai dakarun kasar Yemen din sun matsa kaimi wajen kai hare-hare cikin kasar Saudiyya din a matsayin mayar da martani ga ci gaba da hare-haren wuce gona da iri da Saudiyya take jagoranci kasar Yemen din tun shekaru ukun da suka gabata lamarin da yayi sanadiyyar mutuwar sama da mutane 14,000.