Sojojin Yamen Sun Samu Nasarar Halaka Sojojin Mamayar Saudiyya Masu Yawa

Sojojin Yamen da dakarun kungiyar Ansarullahi sun kashe sojojin mamayar Saudiyya masu yawa a sassa daban daban na kasar ta Yamen.

Gidan talabijin na Al-Masirah na kasar Yamen ya watsa rahoton cewa: A dauki ba dadin da aka yi tsakanin sojojin Yamen da sojojin rundunar kawancen Saudiyya 'yan mamaya a yankin kudancin Yamen, sojojin Saudiyya akalla hudu ne suka halaka.

Har ila yau sojojin Yamen da dakarun sa-kai na kungiyar Ansarullahi na kasar sun kai harin kwantar bauna kan sojojin Saudiyya a yankin Attahiyata da ke garin Hudaidah, inda suka kashe sojojin Saudiyya biyu.

Kamar yadda sojojin na Yamen da dakarun sa-kai na kasar suka harba makamai masu linzami kan sansanin sojin hayar Saudiyya a yankin garin Ta'az, inda suka tarwatsa sansanin lamarin da ya janyo hasarar rayuka tare da jikkata da dama daga cikin sojojin hayar.