Da'ish Ta Aiwatar Da Kisan Gilla Kan Wasu Mutane A Siriya

Kungiyar ta'addanci ta Da'ish ta aiwatar da kisan gilla kan wasu fararen hula goma a cikin gidan kurkuku da ke karkashin ikonta a lardin Dire-Zurr da ke gabashin kasar Siriya.

Kungiyar kare hakkin bil-Adama ta kasar Siriya bangaren 'yan adawa a jiya Lahadi ta sanar da cewa: Kungiyar ta'addanci ta Da'ish ta zartar da hukuncin kisa kan wasu fararen hula goma a gidan kurkukun da ke shiyar kudu maso gabashin lardin Dire-Zurr sannan suka yasar da gawawwakin mutanen a kan hanya.

Har ila yau mayakan kungiyar ta Da'ish sun kai harin wuce gona da iri kan sansanin 'yan gudun hijira da ke karkashin kulawar mayakan kungiyar Kurdawa ta Syrian Democratic Forces a yankin kudu maso gabashin lardin Dire-Zurr, inda suka tarwatsa 'yan gudun hijira iyalan gida 130 daga muhallinsu.