Indonusiya : Adadin Mutanen Da Girgiza Kasa Ta Kashe Ya Kai 832

A Indonusiya, adadin mutanen da suka mutu a mummunar girgiza kasa gami da bala'in tsunami da ya auka wa kasar a ranar Juma'a data gabata ya kai akalla 832.

Sabbin alkalumman da aka fitar sun nuna cewa ko baya ga wadanda lamarin ya yi ajalinsu da akwai wasu sama da 500 da suka samu munanen raunuka.

A halin da ake ciki dai masu aikin ceto na ci gaba da maida hankali wajen ceto mutanen da gine gine suka rufta akansu.

Mataimakin shugaban kasar ta Indonusiya, ya ce akwai yiwuwar adadin mutanen da suka mutu ya kai dubbai.