دخوست روزنتون بند او يتيمان يې رخصت شول
ويل شوي چې مخکې په خوست روزنتون کې ۳۵ يتيمان وو.
په افغانستان کې د بشري ناورين له شدت سره، طالبانو په خوست کې د امکاناتو او ډوډۍ د نشتوالي له کبله ليلیه لرونکي یتیمان خپلو کورونو ته رخصت کړي دي.
د دغه روزنتون يوه مسوول سورګل رسنيو ته ويلي، چې په دې روزنتون کې يوازې ۶ هغه ماشومان پاتې دي، چې نږدې خپلوان او کورونه، نه لري.
ويل شوي چې مخکې په خوست روزنتون کې ۳۵ يتيمان وو.
د روزنتون منسوبينو ويلي، چې له ۳ مياشتو راهيسې دوی ته هم معاشونه نه دي ورکړل شوي.
د خوست د اطلاعاتو او فرهنګ رئيس شبير احمد عثماني ويلي، چې د اقتصادي ستونزو له حليدو سره به رخصت شوي يتيمان بیرته را وغوښتل شي.
طالب مشرانو ژمنه کړې، چې يتيمانو ته به خاصه پاملرنه وکړي.
د دوی له واکمنیدو سره افغانستان يو بيساری بشري ناورين تجربه کوي.
د کابل په لويديځ کې ۸ يتيم ماشومان، چې د يوې کورنۍ غړي وو، د لوږې له کبله مړه شول.
نړيوالو ادارو د ۳ ميليونه نورو ماشومانو په اړه هم جدي خبرداری ورکړی، چې د شديد فقر له وجې ممکن مړه شي.
