ملا عبدالغني برادر هرات ولایت ته لاړ

د طالبانو د ریاست الوزرا اقتصادي معاونت په خبرپاڼه کې ویل شوي، ملا برادر  به د دغه سفر په ترڅ کې د زلزلې له امله زیانمنې شوې سیمې له نېږدې وګوري.

په خبرپاڼه کې راغلي چې ښاغلی برادر به د بېړنیو مرستو د رسولو ترڅنګ د راټولو شویو مرستو د عادلانه او سم وېش په موخه اړوندو ارګانونو ته لازمې لارښوونې او سپارښتنې وکړي.

د طالبانو حکومت د هرات ولایت زلزله ځپلو سره د ۱۰۰ میلیونه افغانيو نغدي مرسته هم اعلان کړې ده.

له ملا برادر سربېره د عامې روغتیا وزیر ډاکټر قلندر عباد او د هرات والي مولوي نوراحمد اسلام جار هم د زنده جان ولسوالۍ ته سفر کړی.

د يادونې وړ ده چې هرات کې د زلزلې له امله يو شمېر ټپيان، چې روغتیايي وضعیت یې ډیر وخیم و، د هوايي ځواکونو له لوري کابل ته لېږدول شوي دي.