طالب مشرانو د سولې په اړه له حکمتیار سره تماسونه نیولی

د افغان رسنیو د راپور په اساس، د حزب اسلامی ګوند ویندوئ قریب الرحمن سعید وایی: په دغو تماسونو کښې د سولې پر لارو چارو او امکاناتو خبرې شوی دی.

قریب الرحمن سعید وایی: وروسته له دې چې د افغانستان له دولت سره د حکمتیار سوله  نهایی  او  عملی شوه، د طالبانو یو شمیر مشران  ډاډه شول چې د سولې لار  هم  شته.

ده  همداراز  وویل: یو شمیر طالبان  غواړی  چې  له  دې  فرصته  استفاده  وکړی او  د حزب اسلامی  له  لارې  د سولې  په  پروسه  کښې ګډ شی.

ګلبدین حکمتیار کابل ته له ورتلو وروسته پر طالبانو ږغ وکړ چې  دوئ دې  د خپلو غوښتنو او ارمانونو  د پوره کیدو لپاره  خپل استازی وټاکی.

حکمتیار همداراز  ویلی  چې طالبان  باید د جګړې په  اوږدولو  بهرنیانو ته  د شتون  د دوام  پلمه  په  لاس   ورنه کړی.

ټاکل شوې  وه  چې  سږ کال  ټول  بهرنی  پوځیان  له  افغانستانه  وتلی وائ  خو د طالبانو له  لوری  د کندوز  نیولو او د جګړې تشدید بهرنیان مجبوره کړل چې نه یوازې ۱۳ زره روزونکی او سلاکاران له افغانستانه ونه باسی بلکې افغانستان  ته  د  نورو  ځواکونو  پر  لیږدولو غور وکړی.

ګومان  کیږی  چې  امریکا او  د ناټو  نور  غړی  د  مئی  په  ۲۵  په  بروکسل کښې د ناټو  په  سرمشریزه کښې افغانستان  ته  د نورو پوځیانو د شمیر په اړه پریکړه وکړی.

 د حزب اسلامی ویندوئ  وایی:  که  طالبان  د سولې له  بهیر سره یوځائ شی، دوئ حاضر دی  چې  د سولې د  هرې  موافقې  د اجرا ضمانت  وکړی  او  تر پایه له  طالبانو سره  همکاری وکړی.

سعید وویل: د افغانستان د ستونزو د حل یواځینۍ لار د افغانانو ترمینځ مخامخ  خبرې  دی.

البته طالبانو دغه خبر په کلکه رد کړ.