د پښتو ادب یو بل ستوری ولوید
د افغانستان مشهور لیکوال او شاعر استاد سعد الدین شپون پرون د ستمبر په لسمه نیټه د امریکا په متحده ایالتونو کې په روغتون کې وفات شو.
د افغانستان مشهور لیکوال او شاعر استاد سعد الدین شپون پرون د ستمبر په لسمه نیټه د امریکا په متحد ایالتونو کې په روغتون کې وفات شو. له څه مودې راهیسې استاد شپون بستر و.
استاد شپون د پښتو داستاني ادب یو سرلارې لیکوال و چې د ځانګړي نثر څښتن دی. د ده نثر ځانته سبک لري او ګڼو کره کتونکو د ده پر نثر لیکنې خپرې کړې دي.
تهران ریډیو د هغه په وفات ټولو پښتنو او د شعر و ادب مینه والو ته تسلیت وړاندې کوي.
استاد شپون د کندز په خان اباد ولسوالي کې خپلې لومړنۍ زده کړې وې، د لیسې دوره یې د کابل په حبیبیې کې پای ته رسولې وه او په متحده ایالتونو کې یې ماسټري اخیستې وه.
استاد شپو د افغانستان د علومو اکاډمي غړیتوب درلود او یوه موده یې په اکاډيمي کې کار وکړ. بیا کلونه کلونه د امریکا غږ راډیو د پښتو څانګې ویاند او د خپرونو چمتوکوونکی و.
استاد شپون د ( بنګي غاړه) په څير نایاب اثر له ځانه پرې ایښی دی چې د داستاني ادب بې ساری کرکټرونه پکې انځور شوې دي.
د شين ټاغي په څير ناول کې بیا د وخت سیاسي کرکټرونه ځای شوې دي.
د دغو او یو شمیر نورو داستاني اثارو ترڅنګ استاد شپون د افغانستان یو تکړه شاعر و، د ده شعرونه هم د ده د داستاني اثارو په څیر ځانګړتیا لري، لوستونکی یې درک کوي چې دا شعر د شپون دی، له استاد شپون څخه په مقایسوي ډول شعرونه لږ او نثري اثار ګڼ پاتې دي. ( له تاند ویبپاڼې په مننې سره)
