د زندانيانو د انتقال لپاره د طالبانو تخنيکي ټيم کابل ته ورسېد
د طالب زندانيانو د خلاصون لپاره د طالبانو يو درې کسيز پلاوے نن کابل ته ورسېد.
د طالبانو وياند ذبيح الله مجاهد وايي چې دغه درې کسيز ټيم به د بنديانو د خلاصون د بهیر څارنه کوي او په تخنيکي برخه کې به د اړتيا وړ اقدامات ترسره کوي.
طالبانو د دې درې کسيز پلاوي نومونه نه دي په ډاګه کړي.
بايد وويل شي چې دا پلاوی تر دې وړاندې پنځلس کسيز اعلان شوی و خو اوس درې کسيز پلاوی کابل ته تللی دی.
که څه هم د طالبانو او امريکا ترمنځ د موافقه لیک له مخې د پنځه زره طالب زندانيانو او زر تنه دولتي عسکرو د خلاصون نېټه د کب د میاشتې شلمه نېټه ټاکل شوې وه خو له هغې نېټې اوس نږدې يوه مياشت تيريږی.
د دغو زندانيانو د خلاصون لپاره طالبانو، امريکي او حکومت درې ځلې د ويډيو کنفرانس له لارې خبرې او مشورې کړي دي.
تر اوسه دولتي مسؤلينو کابل ته د طالب پلاوي د راتګ په اړه څه نه دي ويلي.
