پر افغانستان د برید لپاره د پاکستان ګواښونه "احمقانه" دي
د پاکستان پخواني لومړي وزیر عمران خان له زندانه د پاکستان حکومت او پوځ ته په یو پیغام کې ویلي، چې اسلام آباد به د افغان طالبانو له ملاتړ پرته د ترهګرۍ ضد جګړه ونه ګټي.
عمران خان ویلي، پاکستان دې په عاجله توګه د افغان طالبانو له حکومت سره اړیکي ورغوي.
ښاغلي خان د جمعې په ورځ پر اېکس ټولنیزې شبکې خپور کړي پیغام کې د طالبانو د حکومت پر وړاندې د شهباز شریف د حکومت پر تګلارې نیوکه کړې. هغه ویلي چې پر افغانستان د برید لپاره د پاکستان ګواښونه "احمقانه" دي.
د پاکستان حکومت په دې وروستیو کې له ترهګرۍ سره د مبارزې لپاره د عزم استحکام په نوم عملیات پیل کړي چې عمران خان د دې عملیاتو مخالفت کړی دی.
ښاغلي خان ویلي چې د ترهګرۍ پر ضد د عزم استحکام په عملیاتو کې بریا د طالبانو د حکومت له ملاتړ پرته ممکنه نه ده.
د پاکستان پوځ او حکومت په دې وروستیو کې د اورپکو ډلو په ځانګړې توګه د تحریک طالبان پاکستان پر ضد د عزم استحکام په نوم عملیات پیل کړي. د پاکستان یو شمېر سیاسي څېرو او سیاسي ګوندونو له دغو عملیاتو سره مخالفت کړی دی.
