روسیې د چین د سولې د پلان هرکلی وکړ
زمونږ خبریال راپور راکړی روسیې له اوکراین سره د سولې لپاره د چین د دولس ماده ئیز پلان هرکلی وکړ.
د روسیې د بهرنیو چارو د وزیر مرستیال میخائیل ګالوزین وویل په اوکراین کښې د کړکیچ د حل لپاره د چین دولس ماده ئیز پلان کولای شي د سولې د خبرو اترو لپاره د یوه بنسټ په توګه وکارول شي.
د چین خارجه وزارت په اوکراین کښې د سولې لپاره خپل دولس ماده ئیز پلان چې اوربند او د روسیې پرضد د لویدیځو هیوادونو د بایکاټونو پاې ته رسول پکښې شامل دي نندرې ته وړاندې کړی دی.
بل خبر دا چې د کریملین ماڼۍ ویاند دیمیتري پسکوف پرون وویل ماسکو باوري دی چې د روسیې پرضد بایکاټونه کولای شي د نړۍ اقتصاد ته ګوزار ورکړي او د نوي کړکیچ د رامینځته کیدا سبب شي.
دا په داسې حال کښې دي چې د روسیې د مرکزي بانک مشر الویرا نابیولینا ویلي دي چې د ماسکو اقتصاد د بایکاټونو په مقابل کښې لوړ مقاومت وکړ او له بې مخینې دباونو تیر شوی دی.
