Mapigano yazuka kati ya Polisi DRC na waandamanaji wanaopinga mabadiliko ya Katiba

Mamia ya wananchi wa Jamhuri ya Kidemokrasia ya Kongo wameingia mitaani kupinga mabadiliko ya Katiba, ambayo kwa mujibu wa wapinzani yanaweza kufungua njia ya kuongezwa muda wa rais kuweko madarakani. Polisi walitumia mabomu ya machozi na kufyatua risasi hewani katika jaribio la kuwatawanya waandamanaji.

Muungano wa upinzani katika Jamhuri ya Kidemokrasia ya Congo unaojulikana kwa jina la C64, uliandaa maandamano katika mji mkuu wa Kinshasa na miji mingine kadhaa, ikiwemo Lubumbashi na Kindu, licha ya kuwepo kwa vikwazo vilivyowekwa dhidi ya mikusanyiko ya watu kutokana na kuenea kwa kasi kwa ugonjwa wa Ebola.

Maandamano hayo katika jiji la Kinshasa yalianza kwa amani yakishirikisha mamia ya watu. Hata hivyo, baada ya kutokea mapigano kati ya waandamanaji na wafuasi wa serikali, polisi walitumia mabomu ya machozi na kufyatua risasi hewani katika jaribio la kuwatawanya waandamanaji.

Martin Fayulu, mmoja wa viongozi wa upinzani, alisema kwamba: “Serikali ya Kongo inashirikiana na wanamgambo wa kisiasa; polisi walitufyatulia risasi, lakini nilinusurika.”

Patrick Muyaya, msemaji wa Serikali ya Kinshasa, aliwashutumu viongozi wa upinzani kwa kuvuruga shughuli za umma kupitia madai ya uongo kwamba shule zingefungwa siku ya Jumanne. Alisema kuwa haki ya kuandamana inatambuliwa na Katiba, lakini haki hiyo inapaswa kutumiwa kwa njia sahihi na inayofaa.

Hapo awali, mwezi Juni, polisi wa Kongo walikuwa pia wametawanya maandamano yaliyofanyika katika mji mkuu Kinshasa dhidi ya mabadiliko ya Katiba. Katika tukio hilo, watu kadhaa, akiwemo Fayulu, walijeruhiwa.

Kwa mujibu wa ripoti hiyo, Jamhuri ya Kidemokrasia ya Kongo inakabiliwa na migogoro kadhaa, ikiwemo mlipuko wa ugonjwa wa Ebola, pamoja na kuongezeka mzozo wa muda mrefu wa miongo kadhaa na waasi wa M23, ambao wanadaiwa kuungwa mkono na Rwanda, katika maeneo ya mashariki mwa nchi hiyo.

Félix Tshisekedi, Rais wa Kongo mwenye umri wa miaka 62, amekuwa madarakani tangu mwaka 2019, na muhula wake wa pili wa miaka mitano unatarajiwa kumalizika mwaka 2028. Amesema kuwa iwapo mabadiliko ya Katiba yatapitishwa kupitia kura ya maoni ya wananchi, angependa kuendelea na urais kwa muhula wa tatu.