Iran na Russia kusaini mikataba ya kujenga mitambo mipya ya nyuklia

Mkuu wa Shirika la Nishati ya Nyuklia la Iran, Mohammad Eslami, ametangaza kuwa Iran na Russia zitasaini mikataba ya ujenzi wa mitambo mipya ya nyuklia nchini Iran wakati wa ziara yake rasmi nchini Russia.

Eslami aliwasili Moscow Jumatatu akiwa ameongoza ujumbe wa Iran kwa ajili ya mikutano na maafisa wa Russia na kushiriki katika maadhimisho ya Wiki ya Nyuklia Duniani itakayofanyika kuanzia Septemba 25 hadi 29.

Akizungumza na waandishi wa habari, Eslami alisema kuwa mkataba kati ya serikali hizo mbili unatarajia Russia kujenga mitambo minane ya nyuklia, ambapo minne kati ya hiyo itakuwa katika mji wa Bushehr.

Aliongeza kuwa Iran imekamilisha mazungumzo na tafiti muhimu kwa ajili ya utekelezaji wa sehemu ya pili ya mkataba huo, na maeneo ya ujenzi tayari yamechaguliwa, kuandaliwa, na kuwezeshwa.

Baada ya kusainiwa kwa mkataba mwishoni mwa wiki, hatua za kiutendaji kama vile usanifu, uhandisi, na maandalizi mengine zitaanza moja kwa moja.

Kuhusu ushirikiano na Shirika la Kimataifa la Nishati ya Atomiki (IAEA), Eslami amesisitiza kuwa Iran daima imehimiza kundi la E3 (Uingereza, Ufaransa na Ujerumani) kutoendeleza vitendo vinavyoharibu heshima ya Umoja wa Mataifa na taasisi za kimataifa.

Alionya kuwa mradi mataifa hayo yataendelea na mwenendo huo, basi amani ya dunia haitapatikana, kwani hatua zao zinakiuka sheria na kanuni za kimataifa.