Waandishi wa habari; wahanga wa usimuliaji ukweli kuhusu jinai za Wazayuni

Siku 58 zimepita tangu utawala dhalimu wa Kizayuni ulipoanzisha vita dhidi ya Ukanda wa Gaza. Zaidi ya raia 15,000, 70% kati yao wakiwa ni watoto na wanawake, wameuawa shahidi katika vita hivyo. Waandishi wa habari pia ni miongoni mwa makundi muhimu ambayo hayajasalimika na mashambulizi ya makusudi ya Wazayuni katika vita hivyo. Wanahabari 73 wameuawa shahidi ndani ya kipindi cha siku 57.

Waandishi wa habari waliouawa shahidi walikuwa na uraia wa nchi tofauti zikiwemo Palestina, Lebanon na Uturuki. Siku ya Ijumaa pekee, ambayo ilikuwa siku ya kwanza ya vita baada ya kumalizika usitishaji mapigano wa siku saba, waandishi wa habari watatu waliuawa shahidi. Muntaser Mustafa Al-Sawaf na Marwan Al-Sawaf, ndugu wawili waliokuwa wanahabari wa Shirika la Habari la Anatolia la Uturuki, na Abdullah Darwish, mpiga picha na ripota wa televisheni ya Al-Aqsa, ni wanahabari watatu waliouliwa shahidi siku hiyo.

 

Waandishi wa habari wanalengwa kwa makusudi na utawala wa Kizayuni ilhali kwa mujibu wa sheria za kimataifa za kibinadamu, kuwalenga kwa makusudi waandishi wa habari na raia ni mfano halisi wa jinai na uhalifu wa kivita. Kwa mujibu wa sheria za kimataifa, waandishi wa habari wanapaswa wawe na uhuru na ulinzi wa kufanya kazi zao. Kosa pekee na pengine ndilo kubwa zaidi linalofanywa na waandishi wa habari ni kujaribu kuakisi jinai za Wazayuni; na kwa hivyo kama ilivyo kawaida ya utawala huo wa kinyama, waandishi wa habari wanaandamwa na mashambulio ya Wazayuni, ambapo katika vita hivi vya sasa kiwango cha hujuma na mashambulio hayo kimeongezeka zaidi.

Wakati madola yanayodai kutetea uhuru na haki za binadamu yamenyamazia kimya kuuliwa shahidi waandishi wa habari 73, baadhi ya watu na asasi kadhaa zimeguswa na hivyo kuamua kutoa mjibizo kwa jinai hiyo ya Wazayuni. Mick Wallace, mbunge wa Ireland katika Bunge la Ulaya, ameweka ujumbe kwenye mtandao wa kijamii wa X usemao: "serikali ya ubaguzi wa rangi wa Apathaidi ya Israel inawalenga waandishi wa habari wanaoonyesha ujasiri wa kufichua uhalifu wake wa kivita." Jumuiya ya Maripota Wasio na Mipaka imesema, tangu mwaka 2001 utawala wa Kizayuni umeshaua makumi ya waandishi wa habari na haujawajibika kwa suala hilo na kueleza kwamba, viongozi wa Kizayuni hawana nia ya kuwapa ulinzi waandishi wa habari na kimsingi, wanawalenga kwa makusudi.

Jumuiya hiyo ya maripota wasio na mipaka imebainisha kuwa, kukataa utawala wa Kizayuni kuwapa ulinzi waandishi wa habari kumekuwa sababu ya kuteketea roho za waandishi wa habari walioko Gaza. Anthony Belanger, Katibu Mkuu wa Shirikisho la Kimataifa la Wanahabari, ametangaza kwamba kinachotokea dhidi ya waandishi wa habari, wanawake na watoto huko Gaza ni mashambulizi ya kuwalenga watu kwa makusudi.

 

Nukta nyingine muhimu ni kwamba, sambamba na kuuawa waandishi wa habari huko Gaza, vyombo vya habari vya Magharibi vinauunga mkono uhalifu wa utawala wa Kizayuni kwa kuwaachisha kazi waandishi wa habari wanaokosoa jinai za utawala huo dhalimu. Hadi sasa, makumi ya waandishi wa habari wa vyombo vya habari vya Magharibi, ikiwa ni pamoja na BBC, wamesimamishwa kazi kwa kuweka maandiko ya kuunga mkono Palestina kwenye mitandao ya kijamii.

Lakini licha ya mtazamo na muelekeo huo wa nchi za Magharibi na utawala wa Kizayuni kuhusiana na waandishi wa habari, jinai za Wazayuni hazijaweza kufichika; na maoni ya umma ulimwenguni yamejipanga pamoja na kusimama dhidi ya utawala huo mtenda jinai na muuaji wa watoto. Katika taarifa iliyotoa kuwaunga mkono waandishi wa habari, harakati ya HAMAS imesema: "Sera ya kuwaua na kuwateketeza waandishi wa habari kamwe haitaweza kupelekea kufichika ukweli wa jinai za Kinazi za Wazayuni dhidi ya watoto na wanawake na mauaji ya kimbari yanayofanywa na utawala huu unaopata uungaji mkono wa moja kwa moja wa Rais Joe Biden wa Marekani na serikali yake ya Kizayuni".../