Hizbullah: Tumefanikiwa kuangamiza wanajeshi 95 wa Israel
Harakati ya Muqawama ya Hizbullah ya Lebanon imesema zaidi ya maafisa na wanajeshi 95 wa Israel wameuawa na wengine wasiopungua 900 wamejeruhiwa tangu utawala huo ghasibu uanzishe operesheni ya nchi kavu dhidi ya nchi hiyo ya Kiarabu.
Hizbullah imesema hayo leo Ijumaa katika taarifa yake na kueleza kwamba, katika muda wa siku 45 zilizopita, wanamuqawama wa kundi hilo wameharibu idadi kubwa ya magari ya deraya ya Israel, ikiwa ni pamoja na vifaru 42 vya Merkava, buldoza 4 za kijeshi, magari 2 aina ya Hummer, gari moja la deraya, na meli moja ya kubeba askari.
Harakati hiyo ya Muqawama imebainisha kuwa, wapiganaji wake pia wamefanikiwa kutungua ndege tatu zisizo na rubani za Hermes-450 na mbili za Hermes-900 katika kipindi hicho.
Hizbollah ya Lebanon imeendelea kupiga kambi na vituo vya kijeshi vya Israel katika operesheni mpya za kulipiza kisasi katika maeneo yote yanayokaliwa kwa mabavu na utawala huo pandikizi.
Wanamuqawama wa Lebanon karibuni walifanya mashambulizi ya maroketi kwenye maeneo kadhaa ya kijeshi ya Israeli, ikiwa ni pamoja na kambi ya Ramim na ghala la silaha mashariki mwa Akka, huku wakilenga maeneo ya Karmiel, Metulla, na Krayot.
Kadhalika sehemu kadhaa za mikusanyiko ya wanajeshi wa utawala huo pia zilipigwa moja kwa moja na maroketi ya Hizbullah. Hii ni katika hali ambayo, tangu Oktoba 2023, Israel imeua zaidi ya watu 2,800 nchini Lebanon.
Wengi wao wameuawa shahidi katika muda wa mwezi mmoja uliopita, huku kukiwa na mashambulizi makali ya anga na hujuma za ardhini zinazoendelea kufanywa na Wazayuni maghasibu huko Lebanon.
