Mkuu wa Majeshi ya Israel akoswakoswa kaskazini mwa Gaza

Ripoti zinasema kuwa Mkuu wa Vikosi vya Majeshi ya Israel amekoswakoswa katika hujuma ya makombora ya wapiganaji wa Hamas huko kaskazini mwa Ukanda wa Gaza.

Ni baada ya wapiganaji wa tawi la kijeshi la Harakati ya Mapambano ya Kiislamu ya Palestina (Hamas), Izzuddin al-Qassam, kushambulia kwa kombora eneo alipokuwa mkuu wa majeshi ya Israel, Herzi Halevi, huko kaskazini mwa Ukanda wa Gaza na kumkosakosa.

Duru za Haaretz huko Israel zimeripoti kuwa, wapiganaji wa Brigedi za al-Qassam, tawi la kijeshi la Hamas, wamefanikiwa kushambulia nyumba ambayo Halevi aliaminika kuwepo kaskazini mwa Gaza.

Vyombo vya habari vya Israel vinasema kwamba, Halevi ameokoka jaribio la mauaji, kwa sababu shambulio hilo lilitokea muda mfupi tu baada ya kuondoka kwenye nyumba hiyo iliyoshambuliwa kwa makombora ya Hamas.

Wanajeshi wasiopungua 4 wa kikosi cha 888 cha jeshi la Israel wameuawa katika shambulio hilo la Hamas.

Hapo awali, nyumba ya Waziri Mkuu wa Israel, Benjamin Netanyahu katika mji wa pwani wa Caesarea, kusini mwa Haifa ililengwa kwa shambulizi la ndege isizo na rubani ya harakati ya Hizbullah ya Lebanon.