Bahman 22 dhihirisho la nguvu za taifa la Iran

Tarehe 11 Februari ni siku ya kuadhimisha ushindi wa Mapinduzi ya Kiislamu maarufu kwa sherehe za Bahman 22 nchini Iran. Leo (Alkhamisi) Mapinduzi ya Kiislamu ya Iran yameadhimisha miaka 37 ya tangu kupata kwake ushindi tarehe 11 Februari 1979.

Ushindi huo ulikuwa ni nukta muhimu sana na ya kudumu milele. Ushindi huo adhimu si tu kwamba uliandaa uwanja wa kutokea mabadiliko makubwa na ya kimsingi nchini Iran, bali mapinduzi hayo yamekuwa na taathira kubwa kieneo na kimataifa. Hivyo maadhimisho ya Bahman 22 ni kukumbuka tukio kubwa katika historia na yanaonesha namna Mapinduzi ya Kiislamu na mfumo wa Jamhuri ya Kiislamu ulivyoimarika, ulivyo msafi na ulivyo na harakati nyingi za maana.
******
Wanafikra na wachambuzi wengi wa masuala yanayohusiana na mapinduzi tofauti duniani wote wanakubaliana kuwa, Mapinduzi ya Kiislamu ya nchini Iran, licha ya kupita zaidi ya miongo mitatu tangu yalipopata ushindi, hadi hivi sasa hayajajitenga na malengo yake ya tangu awali kabisa na hadi leo hii wananchi wa Iran wanashirikiana kwa wingi mno kulinda na kufanikisha malengo ya mapinduzi yao ya Kiislamu. Kwa maneno mengine ni kuwa, licha ya kwamba mapinduzi yote mengine duniani huwa yanaachana na malengo yao ya awali kadiri siku zinavyopita na hatimaye kudhoofika na kusambaratika kabisa mapinduzi hayo, lakini Mapinduzi ya Kiislamu ya Iran yameweza kudumu katika malengo yake yale yale ya awali licha ya kuweko mashinikizo mengi na njama za kila aina, kuanzia vita vya kujihami kutakatifu vilivyoanzishwa na utawala wa zamani wa Iraq dhidi ya Jamhuri ya Kiislamu ya Iran hadi kuwekewa vikwazo vya kila aina vikiwemo vya kiuchumi, lakini mapinduzi haya hayajatetereka, bali yameendelea kuwa imara na kuzidi kuyaathiri mataifa mengine duniani.
Hatua zilizochukuliwa na maadui wa Mapinduzi ya Kiislamu kama vile kuiwekea Iran vikwazo vya kiuchumi, na kujaribu kulikwamisha taifa hili katika jitihada zake za kujiletea maendeleo kwenye nyuga tofauti, zote zimeshindwa. Pamoja na kuwa, Iran inakiri kwamba vikwazo vimelisababishia matatizo taifa hili, lakini pia ugumu huo umezidi kuyaimarisha Mapinduzi ya Kiislamu na kuyapa nguvu za kuzidi kujitegemea.
Hii ina maana ya kwamba, kusimama kidete taifa la Iran katika kukabiliana na madola ya kiistikbari na kibeberu, si nara na maneno matupu, bali Mapinduzi ya Kiislamu ambayo ni mapinduzi yenye uungaji mkono mkubwa zaidi wa wananchi duniani, yamewaandalia wananchi wa Iran mazingira mazuri sana kiasi kwamba wananchi hao wameweza kupiga hatua nzuri mno kuelekea kwenye ufanikishaji wa malengo yao, bila ya kutoka angalau kidogo nje ya malengo makuu matukufu ya Mapinduzi ya Kiislamu.
*******
Malengo na shabaha za kimapinduzi za taifa la Iran kwa hakika zinadhihirika wazi katika mfumo wa Jamhuri ya Kiislamu. Pamoja na kwamba watu ambao wanazijua fikra za mapinduzi haya wanatambua kuwa, kushiriki kwa wingi mno wananchi wa Iran katika maadhimisho ya Bahman 22 ni kutangaza upya utiifu wao kwa malengo ya Mapinduzi ya Kiislamu lakini kujitokeza kwa wingi kiasi chote hicho wananchi katika maadhimisho ya ushindi wa Mapinduzi ya Kiislamu kuna na ujumbe mwingine, nao ni wa kuwatangazia walimwengu kuwa katika taifa la Iran kuna umoja na mshikamano mkubwa kati ya wananchi wote.
Kwa kushiriki kwa wingi mno na kwa kauli moja na kwa hamasa na shauku kubwa wananchi wa Iran kwenye maadhimisho ya Bahman 22 kunazidi kuyapa kinga matunda ya mfumo wa Jamhuri ya Kiislamu na kuwathibitishia walimwengu kuwa, wananchi wa Iran kamwe hawako tayari kuona mafanikio yao yanachezewa na kwamba mrengo wowote unaokwenda kinyume na malengo matukufu ya Mapinduzi ya Kiislamu, iwe ni wa ndani au nje ya mipaka ya Iran, hauwezi kutia doa kwenye msimamo huo.
Hivyo ujumbe muhimu unaopatikana katika maadhimisho ya Bahman 22 ya kuadhimisha ushindi wa Mapinduzi ya Kiislamu ni kusimama kidete taifa la Iran mbele ya maadui na njama zao ambao wanatafuta kila njia kufanikisha njama zao hizo nchini Iran imma kupitia vita vya moja kwa moja vya kijeshi, au kwa kutumia vita laini. Muono huo wa mbali wa taifa la Iran umefelisha njama zote za maadui. Kwa maneno ya wazi zaidi inabidi tuseme kuwa, kujitokeza kwa wingi mno wananchi wa Iran na kwa hamasa kubwa katika maadhimisho ya Bahman 22 kuna maana ya kupinga ubeberu na uistikbari wa aina yoyote ile na ni kusisitiza kwa mara nyingine tena kuwa wako imara katika kulinda haki zao mbele ya madola ya kiistikbari. Huo ndio uhakika ambao unawafanya mabeberu wa dunia watamani kupasuka kwa hamaki.
*******
Tunapozitupia jicho kazi zilizofanywa na Jamhuri ya Kiislamu ya Iran katika kipindi cha miaka 37 iliyopita tutagundua kuwa, mfumo huo wa Kiislamu umeweza - kwa ushujaa mkubwa - kuzishinda njama na mitihani yote mizito ya vita vya kijeshi na vita laini na katika siku za usoni pia, taifa hili halitaruhusu madola yanayopenda kujikumbizia kila kitu upande wake, kulishinikiza kisiasa, kiuchumi kwa vitisho vya kijeshi na litahakikisha kuwa Iran ya Kiislamu inazidi kupiga hatua katika njia yake ya kujiletea maendeleo.
Mafanikio ya Iran katika uga wa kidiplomasia na kuweza taifa hili kubadilisha vitisho vya maadui katika kadhia ya nyuklia kuwa maelewano na kutambuliwa haki ya Iran katika uga wa nyuklia pamoja na mafanikio mengine mengi, yanaonesha namna Iran ilivyo na nguvu katika upande usiokuwa wa kutumia nguvu za kijeshi.
Maadhimisho ya mwaka huu ya Bahman 22 ya ushindi wa Mapinduzi ya Kiislamu ya Iran yameambatana na ushindi mwingine mwingi katika nyuga za kisiasa na katika mazungumzo ya nyuklia yaliyopelekea kuanza kutekelezwa mpango maalumu wa JCPOA. Bila ya shaka yoyote, mafanikio hayo yatazidi kuutia nguvu muqawama wa taifa la Iran na kuzidi kuwakatisha tamaa maadui wa taifa hili. Mafanikio hayo yamezidi kuwafanya wananchi wa Iran wapate nguvu za kupigania haki zao na kujiletea maendeleo, kama ambavyo yanazidi kuyavutia mataifa mengine yanayopigania ukombozi duniani ili nayo yasitetereke katika kukabiliana na madola ya kibeberu ulimwenguni.
Leo hii Jamhuri ya Kiislamu ya Iran imepata mafanikio makubwa katika nyuga zote. Katika upande wa elimu na teknolojia, Iran leo hii iko juu ya wastani wa ustawi na kuzalisha elimu na katika baadhi ya masuala ya kisayansi kama vile kuzalisha seli shina katika elimu ya shabihishi (cloning), katika teknolojia ya nyuklia na uzalishaji wa dawa za kila namna za kutumia mionzi kwa kutumia teknolojia ya nyuklia kutibu magonjwa sugu na vile vile katika uzalishaji wa fueli nyuklia inayohitajiwa na vinu vya atomiki na kuzalisha mazao kwa kutumia teknolojia ya Nano, pamoja na mafanikio mengine mengi, ni mambo ambayo yameiweka Iran katika orodha ya nchi zilizopiga hatua kubwa katika elimu na teknolojia za kisasa. Hii ni katika hali ambayo, katika miaka yote hii, Iran iko chini ya vikwazo ambavyo maadui walioviweka wanajigamba kuwa ni vikwazo vya kuifanya kilema Iran. Vikwazo hivyo vilikuwa vingi kiasi kwamba madola ya kibeberu yalifikia hatua ya hata kuizuia Iran isisambaze makala zake za kielimu kwenye majarida ya kielimu ya nchi za Magharibi. Hata hivyo, leo hii tena, kipindi hicho kimeshapita. Katika upande wa miamala ya kiuchumi ya baada ya kutekeleza mpango wa JCPOA wa makubaliano ya nyuklia kati ya Iran na kundi la 5+1 pia, leo hii Iran imekuwa chaguo la juu la nchi za Ulaya na Asia na kwamba mafanikio yote haya yamepatikana licha ya kuweko ukwamishaji wa kila aina wa mabeberu wanaoongozwa na Marekani.
******
Kiujumla ni kuwa, mafanikio iliyopata Jamhuri ya Kiislamu ya Iran bila ya kutumia nguvu za kijeshi ni makubwa sana katika nyuga tofauti na hilo linaonekana kwa uwazi kabisa katika nyuga zote. Amma muda wa makala hii maalumu umeisha kwa leo. Ni matumaini yangu mumeweza kufaidika vya kutosha. Ishini salama.