An Dakatar Da Jiragen Ruwan Dakon Man Fetir Biyu a Tripoli

Dakarun Ruwan Kasar Libiya Sun Samu Nasarar dakatar da wasu jiragen ruwa masu safarar Danyen Man fetir da ake sacewa na kasar a yammacin birnin Tripoli.

Kamfanin dillancin Labaran Reuteus ya nakalto Abu Kasim mai magana da yawun dakarun ruwan kasar Libiya a jiya Juma'a na cewa bayan kwashe sa'o'i ana musayar wuta tsakanin Dakarun ruwan kasar da masu safarar danyan da ake fitarwa ba kan ka'ida ba, Dakarun ruwan sun samu nasarar kame jiragen ruwan daukan Man fetir din guda biyu, daya na dauke da tutar kasar Ukrein, daya kuma na dauke da tutar wata kasar Afirka a yankin Sidy Saeed na ruwan birnin Tripoli

Saidai kuma Kakakin Rundunan tsaron Ruwan na kasar Libiya bai bayyana irin asarar rayuka ko dukiya da wannan musayar wuta ya janyo ba.

Ya zuwa yanzu Dakarun tsaron ruwan kasar Libiyan sun samu nasarar kama Jiragen ruwan masu safarar danyan Man fetir din kasar ta barauniyar hanya da dama a gabar tekun kasar.