Tashin Bam Ya Hallaka Mutum 8 A Tsakiyar Kasar Mali.

Ma'aikatar tsaron Mali ta sanar da hallakar sojoji 7 da wani farar hula guda sanadiyar tashin Bam a tsakiyar kasar

Kamfanin dillancin labaran kasar Faransa ya nakalto ma'aikatar tsaron kasar Mali a wannan alhamis na cewa Wani bom da aka dasa a kan hanyar ficewar jami'an tsaron kasar ya tashi da motocin sojoji guda biyu, lamarin da ya yi sanadiyar mutuwar sojoji 7 da wani direba farar hula  a yayin da yake ficewa a wurin da lamarin da ya faru.

Sanarwar ma'aikatar tsaron ta Mali, ta ce wannan hari na ta'addanci ya faru jiya laraba a wani yankin dake tsakanin gariruwan Tombouctou dake arewaci da Mopti na tsakiyar kasar.

Tun daga shekarar 2012 ne kasar Mali ta fada cikin matsalar tsaro bayan juyin milkin da aka yiwa shugaban kasar, inda kungiyoyin 'yan tawayen Abzunawa da masu tsananin kishin addinin islama suka mamaye wasu yankuna na kasar, a shekarar 2015, matsalar tsaro ta wanzu zuwa kasashen Mali da Burkina Faso dake makwabtaka da kasar.