Libiya : 'Yan Ta'addan Da'esh Sun Kashe Mutane A Garin Al-Jufra

Wasu gungun 'yan ta'addan kungiyar Da'ish sun kaddamar da harin wuce gona da iri kan yankin Fuqaha da ke tsakiyar kasar Libiya, inda suka kashe mutane tare da sace matasa da 'yan sanda.

Majiyar tsaron Libiya ta sanar da cewa: Wasu gungun 'yan ta'addan kungiyar Da'ish sun kaddamar da harin wuce gona da iri kan yankin Fuqaha da ke garin Al-Jufra a tsakiyar kasar Libiya a jiya Lahadi, inda suka kashe mutane hudu tare da yin awungaba da wasu matasa, kamar yadda suka kaddamar da farmaki kan ofishin 'yan sandan yankin tare da kame wasu adadi na 'yan sanda a matsayin fursunonin yaki.

Majalisar Shawara ta yankin Fuqaha ta bukaci mahukuntan Libiya da su hanzarta daukan matakin taka burki wa kungiyar ta'addanci ta Da'ish tare da kokarin 'yanto mutanen da suka sace.