Ci Gaba Da Kai Harin Wuce Gona Da Iri A Yemen
Dan Yemen Guda Yayi shahada sanadiyar harin wuce gona da irin da kawancen Saudiya ya kai jiya Litinin a kan iyakar Jihar Sa'ada.
Majiyar Gwamnatin kasar Yemen ta sanar da cewa Jiragen yakin kawancen Saudiya sun kai hare-haren wuce gona da iri kan gidajen fararen hula a yankunan dake kan iyakokin jihar Sa'ada a jiya Litinin, lamarin da ya yi sanadiyar Shahadar Mutum guda tare da jikkatar wasu da dama na daban, har ila yau hari ya janyo hasara mai yawa ga gidajen fararen hula na yankunan.
Majiyar ta kara da cewa a daidai lokacin kai wadannan hare-hare,Sojojin kawancen saudiyar na kasa sun kai farmaki a yankunan dake kauyukan Razih, inda suka jikkata wani farar hula guda.
A nasu bangare, Sojoji da kuma Dakarun sa kai na kasar Yemen sun samu nasarar hallaka Sojojin Saudiya uku a yankunan Jizan da Najran tare kuma da dakile ci gaban mamayar Dakarun kawancen na Saudi-Arabiya.wasu daga cikin kabilun Yemen a jihar Marib da Damar, jiya Litinin sun gudanar da wani taro inda daga karshen suka bayyana shirin su na shiga yaki da kasar Saudiyan tare kuma da bayyana goyon bayan su ga Dakarun sa kai na kungiyar Ansarullah.
