Palastinawa Biyu Sun Yi Shahada A Gabashin Khan Yunus

Jami'an tsaron HK Isra'ila sun buda wuta kan wani gungun matasan Palastinawa a yankin kan iyaka da gabashin Khan Yunus, lamarin da ya yi sanadiyar shahadar biyu daga cikinsu.

Kamfanin dillancin labaran Fars ya habarta cewa a ci gaba da farmakin da jami'an tsaron HKI ke kaiwa kan al'ummar Palastinu a yankin Zirin Gaza,matasa biyu sun yi shahada a wannan lahadi sannan wasu da dama sun jikkata.

A cikin makunin baya-bayan nan yankin zirin Gaza dake iyaka da HK Isra'ila ya fuskantar rikici mai tsanani tsakanin Palastinawa da jami'an tsaron Isra'ila, lamarin da ya zuwa yanzu ya yi sanadiyar shahadar Palastinawa sama da 50 tare kuma da jikkatar kimanin dubu takwas na daban.

A daren jiya Assabar ma wani Bam ya tashi a tsakiyar Gaza,lamarin da ya yi sanadiyar shahadar mayakan Kassam dake a matsayin  bangaren soja na kungiyar gwagwarmayar Hamas.

Cikin wata sanarwa da ta fitar, kungiyar gwagwarmayar Hamas ta ce a daren jiya Assabar, mayakanta sun gano wata cibiyar leken asiri ta haramtacciyar kasar Isra'ila a tsakiya yankin Gaza tare da kuma rusa ta.