An Hallaka Sojojin Hayar Saudiya Masu Yawa A Yemen

Dakarun tsaron Yemen sun samu nasarar hallaka sojojin hayar saudiya da dama a wani farmaki da suka kai sansaninsu na jihar Ta'az dake kudu masu yammacin kasar

Kamfanin dillancin Irna ya habarta cewa a wannan talata Dakarun ruwa na kasar yemen sun kai farmaki kan wuraren taruwar sojojin hayar Saudiya a gabar tekun Mekha na jihar Ta'az tare da hallaka da dama daga cikinsu, inda rahotani suka bayyana cewa mafi yawa daga cikin sojojin da aka hallaka 'yan kasar hadaddiyar daular larabawa ne.

Har ila yau sanarwar ta ce Sojojin sun wargaza kayan yaki masu yawa na hadakar sojojin hayar na saudiya, a bangare guda kuma Sojojin na yemen sun hallaka sojojin saudiya biyu a wani harin makami mai linzami da suka kai tudan Annasor na yankin Jizan dake a kudancin Saudiya.

A ci gaba da ruwan bama-baman da jiragen yakin kawancen saudiya ke yiwa  kan Al'ummar kasar Yemen din, wani dan yemen guda ya yi shahada sannan wasu uku na daban sun jikkata a yankin His.

Har ila yau rahoton ya ce jiragen yakin kawancen saudiya sun kai hari har so biyar a garin Hudaida dake yammacin kasar ta Yemen, lamarin da yayi sanadiyar shahada da kuma jikkatar wasu fararen hula da dama.