Wani Jirgin Saman Kamfanin Emirates Yayi Hatsari Dauke Da Mutane 275

Kamfanin jiragen saman Emirates na kasar Hadaddiyar Daular Larabawa ya sanar da cewa wani jirgin saman kamfanin dauke da fasinjoji da ma'aikata 275 yayi hatsari a filin jirgin saman Dubai

Hotunan da ake ci gaba da sanyawa a kafafen watsa labarai suna nuni da yadda hayaki ke tashi daga cikin jirgin wanda ya fado a filin jirgin saman na Dubai to sai dai gwamnatin kasar ta ce an sami nasarar fitar da dukkanin fasinjojin da ke cikin jirgin cikin nasara.

Cibiyar watsa labarai na birnin Dubai din ta ce jirgin ya taso ne daga kasar Indiya, to sai dai jirgin yayi hatsari ne yayin sauka. Cibiyar ta kara da cewa an samu nasarar fitar da dukkanin fasinjojin da suke cikin jirgin cikin nasara ba tare da sun sami rauni ba.

Mahukunta a Dubai din dai sun sanar da dakatar da dukkanin zirga zirgan jirage a filin jirgin saman har sai zuwa wani lokaci nan gaba.