په تورخم کې د پاکستاني پوځیانو اوطالبانو ترمنځ نښته رامنځته شوې
د تورخم پوله ایزې لارې مسئول محمد صديق د یکشنبې په ورځ د افغانستان او پاکستان په ګډه پوله د دې لارې له تړلو خبر ورکړ. دښاغلي صديق په وينا، دغه لار د پاکستان له لوري خپلو ژمنو ته د نه ژمنتیا له امله د بار وړونکو موټرو په ګډون د ټولو موټرو پر مخ تړل شوې ده.
د نن ورځې راپورونه پر دې پوله د طالبانو او پاکستاني ځواکونو ترمنځ د نښتې خبر ورکوي.
د شفقنا خبري آژانس د راپور له مخې، سیمه ایزو سرچینو نن سهار د دغې نښتې د تاییدولو په ترڅ کې ټینګار کړی چې دواړو لورو پر یو بل د سپکو او درنو وسلو ډزې کړې دي.
دغه سرچینې له پاکستاني ځواکونو سره په نښته کې د یوه طالب د وژل کېدو خبر ورکوي.
په تورخم کې طالب چارواکو تر اوسه دغه نښته تایید کړې نه ده.
دغه طالب چارواکي د پولې د تړلو په اړه د پاکستان د نه پوره شوې ژمنو یادونه نه ده کړې، خو په دې وروستیو کې داسې راپورونه ورکړل شوي چې پاکستاني پولیس له پولې د اوښتو پرمهال له افغان وګړو څخه په زور پیسې اخلي.
تر دې مخکې هم د پاکستاني پولیسو له خوا له مسافرو د پیسو اخیستلو راپورونه ورکړل شوي وو.
تورخم لاره د افغانستان او پاکستان تر منځ یوه له مهمو سوداګریزو لارو څخه ده.
