د افغانستان او پاکستان خارجه وزیرانو سره وکتل
د افغانستان د بهرنیو چارو وزیر د افغان حکومت او طالبانو ترمنځ د سولې پر مستقیمو خبرو ټینګار وکړ او د پاکستان د بهرنیو چارو وزیر په افغانستان کې د سولې راوستل د ټولې سیمې مسوولیت وباله.
د افغانستان د بهرنیو چارو وزارت لخوا د رسنیو ته د لیږل شوې خبرپاڼې له مخې، د افغانستان د بهرنیو چارو وزیر صلاح الدین رباني له خپل پاکستاني سیال مخدوم شاه محمود حسین قریشي سره وکتل.
قریشي با ثباته او امن افغانستان د پاکستان په ګټه وباله او د سولې راوستو لپاره یې د پاکستان پر هڅو ټینګار وکړ.
دغه راز قریشي د افغانستان په کورنیو چارو کې د پاکستان د نه لاسوهنې پر سیاست د ټینګار تر څنګ په افغانستان کې د سولې بریالیتوب د ټولې سیمې مسوولیت وباله.
د یادې لیدنې پر مهال صلاح الدین رباني وویل: د افغانستان او پاکستان ترمنځ اړیکې د ښه کېدو په حال کې دي.
نوموړي دغه راز د طالبانو او افغانستان ترمنځ پر مستقیمو خبرو ټینګار وکړ.
د پاکستان د بهرنیو چارو وزیر شاه محود قریشي نن سهار په یو رسمي سفر کابل ته تللی دی.
