د بحرین د جو بند قیدیانو د مرستې غوښتنه کړې

د آل خلیفه رژیم د ځپونکو سیاستونو په دوام کښې په جو نومي زندان کښې بحریني بندیانو د دغه هیواد له خلکو وغوښتل چې دوي د آل خلیفه واکمنانو له ظلم او ستم څخه وژغوري.

د تسنیم خبري آژانس د خبر له مخې په بحرین په تیره بیا د دغه هیواد په مرکزي جیل کښې د بشري حقوقو د خلاف ورزۍ په دوام کښې د دغه جیل بندیانو په یو پيغام کښې د آل خلیفه رژيم د جیلرانو د بد سلوک او شکنجې په سمدستي بندیدو باندې په ټینګار سره وویل: کابو څلور زره قیدیان د زندانبانانو لخوا د قانون د خلاف ورزۍ له امله په ډیرو بدو حالاتو کښې شپې سبا کوي.

د جو جیل د بندیانو په پیغام کښې راغلي دي: آل خلیفه رژيم حتی تشناب ته د بندیانو تګ محدود کړی داشان چې په هرو پنځو ساعتونو کښې یوځل د تشناب د کارولو حق لري.