Russia kushirikiana na Ethiopia katika sekta ya nyuklia

Kampuni ya nyuklia ya Rosatom ya Russia imetia saini mkataba na Wizara ya Ubunifu na Teknolojia ya Ethiopia kufanya upembuzi yakinifu wa ujenzi wa Kituo cha Sayansi na Teknolojia ya Nyuklia (NSTC) katika nchi hiyo ya Afrika.

Rosatom imesema hivi karibuni pia itaanza kutathmini sekta isiyo ya nishati ya Ethiopia ili kubaini jinsi teknolojia ya nyuklia na mionzi inavyoweza kushughulikia mahitaji ya kiuchumi ya nchi hiyo.

Uchambuzi huu utasaidia kukusanya orodha ya watumiaji watarajiwa wa teknolojia hizi, kuweka msingi wa soko la bidhaa na huduma za kibiashara kulingana na uwezo wa NSTC.

Waziri wa Ubunifu na Teknolojia wa Ethiopia, Belete Molla, ameelezea matumaini kuhusu ushirikiano huo, akionyesha umuhimu wa jukumu la Rosatom katika kusaidia Ethiopia kuendeleza nishati ya nyuklia na programu zisizo za nishati.

Anaamini kwamba kampuni ya Rosatom "itaisaidia Ethiopia katika kuendeleza nishati ya nyuklia ya kitaifa na programu zisizo za nishati pamoja na miradi ya mtu binafsi."

Rosatom alisisitiza kujitolea kwake katika kukuza maendeleo ya nyuklia katika bara la Afrika. Ilya Vergizaev, Mkurugenzi Mtendaji wa Rosatom amesema: "Tunafanya kazi na washirika wetu wa kimataifa katika miradi mbalimbali kuendeleza teknolojia ya nyuklia na mionzi katika bara la Afrika."