Mgombea wa upinzani nchini Ghana John Mahama ajitangazia ushindi uchaguzi wa urais

Mgombea wa upinzani John Mahama amejitangazia ushindi katika uchaguzi wa rais wa Ghana Jumapili baada ya mgombea wa chama tawala Makamu wa Rais Mahamudu Bawumia kukubali kushindwa. Makamu wa rais alisema Mahama ameshinda kiti cha urais "kwa kishindo".

Rais wa zamani John Mahama, kiongozi mkuu wa upinzani nchini Ghana, alijaribu mara mbili kabla ya kushinda mwaka huu.

Sasa amepata ushindi mkubwa katika jaribio lake la tatu la urais ambapo kampeni yake ilijikita katika kutatua matatizo ya kiuchumi  na hivyo kumuwezesha kushinda uchaguzi wa Jumamosi.

Ushindi wake unaashiria ushindi wa kihistoria, na kumfanya kuwa rais wa kwanza katika miongo mitatu ya Jamhuri ya Nne ya Ghana -- tangu kurejea kwa demokrasia ya vyama vingi vya 1992 -- kutwaa tena urais katika uchaguzi.

Mahama, wa chama cha National Democratic Congress (NDC), alimshinda Makamu wa Rais Mahamudu Bawumia, ambaye aliwakilisha chama tawala cha New Patriotic Party (NPP) na ambaye alikubali kushindwa siku ya Jumapili.

Uchumi uligeuka kuwa suala kuu la uchaguzi baada ya Ghana kutolipa deni lake na kuingia mkataba wa dola bilioni 3 na Shirika la Fedha la Kimataifa.

Mahama, 66, ambaye alihudumu kama rais kutoka 2012 hadi 2017, ameahidi "kuijenga upya" Ghana, kujadili upya mkataba wa IMF na kuanzisha uchumi wa "saa 24" ili kuunda nafasi za kazi. Ahadi yake iliwavutia vijana wengi wa Ghana ambao hawana ajira.