Trump kuzisakama nchi maskini za Afrika kwa ushuru wa 10%
Rais wa Marekani, Donald Trump anapania kupanua ajenda yake ya ushuru, akitangaza mipango ya kutoza ushuru mpya wa forodha wa zaidi ya asilimia 10 kwa bidhaa zinazoagizwa nchini humo kutoka mataifa madogo, ikiwa ni pamoja na kadhaa ya bara Afrika na eneo la Caribbean.
Hatua hiyo inaashiria mabadiliko makubwa katika sera ya biashara ya Marekani, inayolenga kile Trump anachokielezea kama "kujibu mapigo" ya ushuru unazotozwa bidhaa za Marekani.
Kwa mujibu wa tovuti ya Africa News, nchi kadhaa za Afrika tayari zinajiandaa kwa ongezeko kubwa la ushuru wa bidhaa za Marekani zinazoingia katika nchi hizo.
Inaarifiwa kuwa, Lesotho, taifa dogo la Kusini mwa Afrika, linaweza kukabiliwa na ushuru wa juu wa hadi asilimia 50 kwa bidhaa zinazouzwa Marekani. Wakati utozaji wa ushuru huo kwa sasa umesimamishwa kwa muda kupisha kipindi cha mashauriano cha miezi mitatu, wasiwasi unaongezeka juu ya kuzorota kwa uchumi katika siku za usoni.
"Hizi ni nchi nyingi kati ya hizo, zipo karibu nchi 200," Trump amesema akijibu maswali kuhusu mataifa ambayo yangeathiriwa na ushuru huo na kuongeza kuwa, "Labda tutaweka ushuru mmoja kwa wote."
Shirika la Biashara Duniani limeitaka Marekani kutazama upya uamuzi huo. Mkurugenzi Mkuu wa WTO, Ngozi Okonjo-Iweala ametoa wito kwa nchi za Afrika kusamehewa ushuru unaopendekezwa, akionya kwamba hatua hizo zinaweza kuvuruga pakubwa uchumi wa nchi zinazokuwa, na kusambaratisha maendeleo ya miaka mingi.
Shirika la Biashara Duniani lilitahadharisha hivi karibuni kuwa, kuwa ushuru uliotangazwa na Trump utarudisha nyuma biashara ya kimataifa mwaka huu na kupelekea kushuka kwa kasi ukuaji wa uchumi wa dunia.
