Rais wa Iran awasili Jakarta, Indonesia kwa ziara rasmi ya siku mbili

Rais Ebrahim Raisi wa Jamhuri ya Kiislamu ya Iran amewasili Jakarta mji mkuu wa Indonesia kwa ziara rasmi ya siku mbili.

Rais Ebrahim Raisi wa Jamhuri ya Kiislamu ya Iran amewasili Jakarta, akijibu mwaliko rasmi wa Rais wa nchi hiyo Joko Widodo al-maarufu Jokowi.

Lengo la safari hiyo ni kustawisha na kuimarisha zaidi ushirikiano wa kiuchumi, kisiasa na kiutamaduni baina ya mataifa haya mawili muhimu katika ulimwengu wa Kiislamu.

Taarifa za karibu na ofisi ya Rais wa Iran zinasema, kukutana na kufanya mazungumzo na mwenyeji wake Rais Widodo na kutiwa saini hati kadhaa za ushirikiano baina ya Iran na Indonesia katika nyuga mbalimbali imetajwa kuwa sehemu ya ratiba ya Rais Ebrahim Raisi nchini Indonesia. 

Aidha katika safari yake hii, Rais Ebrahim Raisi anatarajiwa kukutana na kufanya mazungumzo na Maspika wa Bunge la Wawakilisha na la Ushauri, wafanyabiashara na wadau wa masuala ya kiuchumi, Maulamaa na wanafikra wa Kiindonesia.

Safari ya Rais wa Jamhuri ya Kiislamu ya Iran nchini Indonesia pamoja na ujumbe aliofuatana nao, inatajwa kuwa ni fursa mwafaka kwa ajili ya sekta za serikali na binafsi za nchi mbili kwa ajili ya kustawisha mahusiano na mashirikiano ya kiuchumi na kibiashara hasa kwa kuzingatia uwezo mkubwa zilizonao nchi mbili hizi.