Mlipuko waua Wapalestina 6 Ukanda wa Gaza, Israel yalaumiwa

Wapalestina wasiopungua sita wanachama wa harakakati ya muqawama ya Palestina Hamas wameuawa katika mripuko wa bomu ulioukumba Ukanda wa Gaza jana Jumamosi.

Wizara ya Afya katika Ukanda wa Gaza imesema mripuko huo wa jana ulitokea katika mji wa Dayr al-Balah ulioko katikati ya eneo hilo ambalo liko chini ya mzingiro wa utawala wa Kizayuni wa Israel.

Taarifa ya wizara hiyo imesema majeruhi wa mripuko huo ambao kiini chake hakijajulikana kufikia sasa wanaendelea kupata matibabu katika Hospitali ya Mashahidi ya al-Aqsa mjini hapo.

Tawi la kijeshi la Hamas Izzuddin Qassam limesema kuna mkono wa utawala haramu wa Israel katika mlipuko huo, uliotokea wakati wa operesheni ya kintelijensia na kiusalama.

Mlipuko huo umejiri wakati huu ambao Wapalestina wamekuwa wakishiriki katika maandamano ya amani ya "Haki ya Kurejea" yaliyoanza tarehe 30 Machi kwa mnasaba wa "Siku ya Ardhi" huko katika Ukanda wa Gaza. 

Hadi sasa Wapalestina 50 wameuliwa shahidi kwa kupigwa risasi na askari wa utawala haramu wa Israel na wengine wapatao elfu nane wamejeruhiwa.