Pars Today

Kundi la wataalamu wa Umoja wa Mataifa limeonya kwamba upelekaji wowote wa silaha au risasi kwa utawala wa Kizayuni wa Israel ambazo zitatumika katika mashambulizi ya ardhini na angani dhidi ya Wapalestina katika Ukanda wa Ghazza uliozingirwa unaweza ukawa unakiuka sheria za kimataifa za kibinadamu, na lazima ukomeshwe mara moja.

Taarifa ya wataalamu hao imepongeza pia uamuzi uliotolewa na Mahakama ya Rufaa ya Uholanzi mnamo Februari 12, ilipoiamuru serikali ya nchi hiyo isitishe kuipelekea Israel vifaa na vipuri vya ndege za kivita za F-35.

Aidha wameyahimiza mataifa mengine kusitisha mara moja kuupelekea silaha utawala huo wa Kizayuni, ikiwa ni pamoja na leseni za usafirishaji na misaada ya kijeshi.

Japokuwa Umoja wa Ulaya umepunguza kasi ya uuzaji silaha kwa Israel, lakini Marekani imeendelea kuwa nchi inayoupelekea utawala huo wa Kizayuni silaha nyingi zaidi; na shehena za silaha zinazosafirishwa kutoka Washington kupelekewa Tel Aviv zimeongezeka zaidi tangu Oktoba 7, 2023.

Wapalestina wanaokaribia 30,000, wengi wao wakiwa wanawake na watoto, wameshauawa shahidi hadi sasa kutokana na vita vya kinyama na mauaji ya kimbari yaliyoanzishwa na utawala dhalimu wa Israel dhidi ya Ukanda wa Ghazza kufuatia Operesheni ya Kimbunga cha Al-Aqsa iliyotekelezwa Oktoba 7,2023 na wanamuqawama wa Palestina.../