Dkt. Ghebreyesus: Marekani ilitoa sababu za uongo kujiondoa katika WHO

Mkurugenzi Mkuu wa Shirika la Afya Duniani (WHO), Tedros Adhanom Ghebreyesus amesema, sababu zilizotajwa na Marekani kujiondoa kwenye shirika hilo la afya la Umoja wa Mataifa si za kweli na akatahadharisha kuwa uamuzi huo utaifanya dunia isiwe salama zaidi.

"Kwa masikitiko, sababu zilizotajwa za uamuzi wa Marekani kujiondoa katika WHO si za kweli. Taarifa ya kujiondoa inaifanya Marekani na dunia kutokuwa salama zaidi", ameeleza Ghebreyesus katika ujumbe alioweka kwenye mtandao wa X.

Amebainisha kuwa, ikiwa ni mwanachama mwanzilishi, Marekani ilichangia "kwa kiasi kikubwa" katika mafanikio ya shirika hilo na akasisitiza kwamba WHO daima imekuwa ikishirikiana na Marekani na nchi zote wanachama "kwa kuheshimu kikamilifu uhuru wao."

"Tunatumai Marekani itarudi kwenye ushiriki hai katika WHO siku za usoni. Wakati huo huo, WHO inabaki imejizatiti kufanya kazi na nchi zote katika kutekeleza dhamira yake kuu na wajibu wake wa kikatiba: kiwango cha juu kinachoweza kupatikana cha afya kama haki ya msingi kwa watu wote," amesisitiza mkurugenzi mkuu wa shirika hilo la Umoja wa Mataifa.

Ujumbe wa Dkt. Ghebreyesus umeendelea kueleza: "Marekani ilisema pia katika taarifa zake kwamba WHO imefuatilia 'ajenda ya kisiasa na kiutendaji iliyosukumwa na mataifa yanayopinga maslahi ya Marekani.' Hii si kweli. Kama shirika maalumu la Umoja wa Mataifa, linalosimamiwa na Nchi Wanachama 194, WHO daima imekuwa na inabaki bila upendeleo na ipo kuhudumia nchi zote, kwa heshima ya utaifa wao, bila hofu au upendeleo".

Maafisa wa Marekani walitangaza hivi majuzi kuwa nchi hiyo imekamilisha kwa njia rasmi kujiondoa kwake katika WHO, ikihitimisha karibu miaka 78 ya uanachama.

Rais wa Marekani, Donald Trump, amekuwa kwa muda mrefu akiikosoa vikali WHO, hasa wakati na baada ya janga la Covid-19.

Trump alilituhumu shirika hilo la kimataifa kwamba lilitathamini vibaya hatua za mwanzo za mripuko wa corona, kuwa karibu sana na China, kukariri taarifa zisizo sahihi kutoka Beijing na kuingiza siasa katika janga kwa kutangaza kwamba vikwazo vya kusafiri vya Marekani dhidi ya China ni vya kibaguzi.

Rais huyo wa Marekani alikosoa pia kile alichokiita mzigo wa kifedha usio na usawa kwa Marekani, akisema Washington ilikuwa inalipa zaidi mno kuliko nchi nyingine, ikiwemo China, bila kupokea matibabu ya haki kwa malipo yake.../