Nafasi ya msikiti wakati wa kutokea Mapinduzi ya Kiislamu ya Iran

Ni matumaini yangu kuwa, hamjambo wapenzi wasikilizaji popote pale yanapokufikieni matangazo haya ya Idhaa ya Kiswahili Sauti ya Jamhuri ya Kiislamu ya Iran hususan huko nyumbani AfrikaMashariki. Ninakukaribisheni mjiunge nami katika kipindi hiki maalumu nilichokuandalieni kwa mnasaba wa masiku haya adhimu ya kuadhimisha ushindi wa Mapinduzi ya Kiislamu ya Iran uliopatikana mwaka 1979 kwa uongozi wa hekima na busara wa Imam Ruhullah Musawi al-Khomeini (r.a).

Kipindi chetu cha leo kitazungumzia nafasi muhimu iliyokuwa nayo misikiti wakati wa harakati za Mapinduzi ya Kiislamu hapa nchini. Ni matumaini yangu kuwa, mtakuwa name hadi mwisho wa kipindi hiki.

Mapinduzi ya Kiislamu ya Iran yalikuwa moja ya harakati kubwa ya wananchi ambayo ilijumuisha humo matabaka mbalimbali ya jamii ya Iran, matabaka ambayo yote yalikuwa na ushiriki amilifu. Kama yalivyokuwa mapinduzi mengine makubwa duniani, Mapinduzi ya Kiislamu ya Iran nayo yalikuwa na himaya kubwa mno ya wananchi. Kwa maana kwamba, kama mapinduzi makubwa ya Ufaransa ambayo yalitokea mwaka 1789 yakianzia katika gereza la Bastille mjini Paris, na kama katika mapinduzi ya Oktoba mwaka 1917 nchini Russia cheche za moto wake zilianzia baina ya wafanyakazi wa viwanda na jamii ya wakulima, vivyo hivyo wakati wa kujiri Mapinduzi ya Kiislamu ya Iran misikiti ilikuwa kituo na kambi ya kidini na kiutamaduni na hivyo kuwa na nafasi nyeti na muhimu katika kupanda mbegu za awali za mapinduzi na kutoa mwelekeo kwa harakati za wananchi.
Wakati wa kujiri Mapinduzi ya Kiislamu, misikiti ilikuwa kiunganishi baina ya viongozi wa mapinduzi na wananchi wanamapinduzi. Kwa hakika misikiti ilikuwa na jukumu la kuwashajiisha wananchi. Katika kipindi chote cha kutokea mapinduzi kuanzia mwanzoni mwa muongo wa 60 hadi wakati wa kupata ushindi mapinduzi hayo mwaka 1979, misikiti ya Iran iliweza kuwa na nafasi athirifu katika kuleta umoja na uratibu wa wananchi katika kukabiliana utawala wa Shah. Uhakika wa mambo ni kuwa, misikiti ilikuwa ikifanya kazi kama chombo cha habari wakati wa kujiri Mapinduzi ya Kiislamu ya Iran. Misikitini kulikuwa kukitolewa mawaidha, hotuba, kuenezwa vitabu, vijarida, matangazo na kanda na kaseti zilizokuwa na hotuba na jumbe za Imam Khomeini (r.a) na kwa muktadha huo, misikiti ikaweza kuleta mawasiliano mazuri baina ya wananchi na kiongozi wa mapinduzi.
Katika kipindi chote cha mapambano dhidi ya utawala wa Kipahlavi, misikiti mingi kama Msikiti wa Jalili, Msikiti wa Lor Zadeh, Msikiti wa Quba na Misikiti ya Bazar ya Tehran ilikuwa na harakati za mapinduzi. Katika Msikiti wa Jalili, Ustadh Murtadha Mutahhari alikuwa akitoa darsa mbalimbali msikitini hapo na kupelekea vijana na wanachuo wengi kuvutiwa na darsa hizo. Shahidi Bahonar Waziri Mkuu wa pili katika Mfumo wa Jamhuri ya Kiislamu ambaye aliuawa shahidi na mamluki wa makundi ya kigaidi, ni shakhsia mwingine ambaye alikuwa akienda katika Msikiti wa Jalili na kutoa hotuba. Ayatullah Mahdavi Kani alikuwa mmoja wa watoaji hotuba wakuu katika msikiti huo. Baada ya kumalizika Swala, Ayatullah Mahdavi Kani alikuwa akitoa hotuba na kuzungumzia masuala mbalimbali yakiwemo yale yanayohusiana na utawala wa Kiislamu.

Masjid al-Jawad ni msikiti mwingine unaohesabiwa kuwa, ulikuwa amilifu na wa kimapinduzi mjini Tehran. Msikiti huo ukiwa msikiti wa kwanza wa kisasa nchini Iran, tangu ulipojengwa na kuanza kutumika rasmi mwaka 1342 Hijria Shamsia hadi sasa, umekuwa na nafasi muhimu sana. Ayatullah Mutahhari alikuwa Imam wa msikiti huo wa al-Jawad kuanzia mwaka 1349 hadi 1351 Hijria Shamsia yaani kabla ya kutiwa kwake mbaroni. Mbali na kuswalisha katika msikiti huo, Ayatullah Shahidi Mutahhari alikuwa akitoa hotuba zilizokuwa zikifichua njama za utawala wa Shah na kuwaamsha wananchi. Aidha alikuwa akiwaalika msikiti hapo, shakhsia watajika wa Kimapinduzi kwa ajili ya kuja kutoa hotuba na hivyo kuufanya msikiti wa al-Jawad kuwa na nafasi muhimu na yenye taathira kubwa katika harakati za mapinduzi ya Kiislamu. Akthari ya jumuiya kama Jumuiya ya Wahandisi, Jumuiya ya Wanachuo wa Kiislamu, Jumuiya ya Wanachuo wa Chuo cha Ufundi, Jumuiya ya Madaktari wa Kiislamu na kadhalika, walikuwa wakivutika katika mazingira ya Msikiti wa al-Jawad kutokana na shakhsia ya kielimu kama ya Shahidi Mutahhari na kufanya harakati katika msikiti huo. Mfano mwingine ni msikiti wa Hidayat wa mjini Tehran. Umuhimu wa msikiti huo ulitokana na jina la Imam aliyekuwa akiswalisha katika msikiti huo yaani Marhumu Ayatullah Twaliqani. Ayatullah Twaliqani alikuwa mwanazuoni mwanamapambano ambaye baada ya kumaliza kuswalisha katika msikiti wa Hidayat alikuwa akitoa darsa ya Tafsiri ya Qur'ani. Darsa ya Tafsiri ya Ayatullah Twaliqani ambayo ilikuwa na sura ya kisiasa na kijamii, ilikuwa ikiwavutia wengi na kuwafanya wakusanyike katika msikiti huo. Utawala wa Kipahlavi ukiwa na lengo la kukabiliana na Mapinduzi ya Kiislamu ulikuwa ukichukua hatua kali za kudhibiti misikiti. Kuichunga misikiti na kudhibiti ratiba zake zote za kiutamaduni na vievile darsa za Qur'ani, Darsa za Fikihi, tamthiliya, visa na usimamizi wa maktaba lilikuwa jukumu la Shirika la Intelijinsia na Usalama wa Taifa la Iran, maarufu kwa jina la SAVAK ambalo lilikuwa moja ya mashirika ya ujasusi yaliyokuwa yakitisha zaidi duniani. Udhibiti wa SAVAK kwa misikiti ulikuwa mkubwa mno kiasi kwamba, hata shughuli kama za hitima, wahusika walikuwa wakitakiwa kabla ya kufanyika shughuli kama hiyo, watoe orodha ya majina ya masheikh au wanazuoni watakaohudhuria katika shughuli hiyo na hata kufanya uratibu na shirika hilo kuhusiana na shughuli kama hizo. Wakati mwingine Shirika la Intelijinsia na Usalama wa Taifa la Iran, lilikuwa likilazimika kufunga baadhi ya misikiti kutokana na udhaifu au kuzidiwa na harakati za wananchi misikitini.

Pamoja na ubinyaji na hatua za udhibiti wa msikiti haukupoteza nafasi yake maalumu katika mapambano na harakati za Mapinduzi ya Kiislamu hapa nchini. Katika fremu ya kutoa mwogozo na muelekeo kwa wanamapinduzi, misikiti ilikuwa na nafasi muhimu pia katika kutatua shida za kifedha. Kuasisiwa katika misikiti mifuko ya utoaji mikopo ilikuwa moja ya njia za kuunga mkono Mapinduzi ya Kiislamu. Akthari ya matajiri wa Kiislamu ambao walikuwa na mfungamano wa karibu na misikiti walikuwa wakiona kuwa ni jukumu lao la kidini kugharamia na kutoa fedha kwa ajili ya kuhudumia misikiti.
John D. Stempel mwandishi wa kitabu cha "Inside the Iranian Revolution" yaani "Ndani ya Mapinduzi ya Iran" anaandika kuhusiana na hilo kwamba, Bazar na msikiti daima vilikuwa na ushirikiano, gharama za Vyuo Vikuu vya Kidini na harija za karibu asilimia 80 za wanazuoni zilikuwa zikigharamiwa na kudhaminiwa na wafanyabiashara hawa. Mwisho wa kunukuu.
Katika upande wa tablighi na upashaji habari pia, misikiti ilikuwa na taathira kubwa mno ikiwa kama kituo cha harakati za mapinduzi. Kwa hakika wakati wa kujiri Mapinduzi ya Kiislamu ya Iran, misikiti ilikuwa ikienda na wakati kikamilifu kuhusiana na matukio ya kisiasa na hali ya kijamii na kama ikitokea tukio la kuvunjia heshima Uislamu au kuhujumiwa maslahi ya nchi, basi cheche za malalamiko ya wananchi na maulama zilikuwa zikianzia msikitini. Kwa mfano mwaka 1962, hotuba ya Imam Khomeini katika Msikiti wa A'adham mjini Qum akilalamikia Mapinduzi Meupe, ilikuwa cheche ya kwanza ya mapinduzi. Kwa mtazamo wa Imam Khomeini ni kuwa, Mapinduzi Meupe ya Shah yalikuwa yakikinzana na misingi ya sheria za Kiislamu.
Baada ya ushindi wa Mapinduzi ya Kiislamu ya Iran pia, misikiti imeendelea kuwa ni ufunguo muhimu katika kuendelea kubakia Mapinduzi ya Kiislamu. Hii leo baada ya kupita miaka 37 tangu kupatikana ushindi wa Mapinduzi Kiislamu hapa nchini, misikiti imeendelea na juhudi zake za kulinda utambulisho wa kidini wa wananchi wa Iran.
Wapenzi wasikilizaji muda wa kipindi chetu maalumu kwa leo umefikia tamati tukutane tena wakati mwingine.
Wassalaamu Alaykum Warahmatullahi Wabarakaatuh.