د اندونیزیا او سویلي کوریا له لورې په را کړه ورکړه کې د ډالرو مخنیوی

پارس تودي - اندونیزیا او سویلي کوریا د ملي اسعارو د را کړې ورکړې په اړه په سوداګریزو چارو کې پخپل منځ کې هوکړې ته ورسیدل.

د پارس ټوډی د خبر له مخې؛ اندونیزیا او سویلي کوریا په دوه اړخیزه سوداګرۍ کې د اندونیزیا روپیا او سویلي کوریا وان کارولو ته د ودې ورکولو په موخه د دواړو هېوادونو ترمنځ د سیمه ییزو اسعارو لیږد (LCT  ) پلې کولو لپاره د همکارۍ چوکاټ باندې هوکړه وکړه.
د برنا خبري اژانس د جاکارتا ګلوب په حواله په یوه راپور کې اعلان وکړ چې دا موافقه د جمعې په ورځ نهايي شوه.

د دې راپور له مخې، د اندونیزیا مرکزي بانک BI)  )هڅه کوي چې د سویلي کوریا بانک (  BOK) سره د ستراتیژیک شراکت په رامینځته کولو سره د متحده ایالاتو ډالرو باندې خپل تکیه کم کړي.

د اندونیزیا او سویلي کوریا ترمنځ د LCT چوکاټ ټاکل شوی چې د سپتمبر په 30 به د تطبیق وړ شي.

په یوه بیان کې، د اندونیزیا د مرکزي بانک د اړیکو څانګې مشر، اروین هاریونو وویل: "د اندونیزیا او سویلي کوریا ترمنځ د LCT چوکاټ پلي کول د دواړو هېوادونو ترمنځ د مالي همکارۍ لپاره یو مهم ګام دی.

هغه زیاته کړه : هيله ده چې د دواړو هېوادونو ترمنځ د LCT چوکاټ په تطبيق سره دوه اړخيزې سوداګريزې راکړې ورکړې زياتې شي، د بهرنيو اسعارو خطر کم شي او د راکړې ورکړې موثريت به ښه شي.

BI او BOK څو بانکونه په اندونیزیا او سویلي کوریا کې د ACCD بانکونو په توګه نومول شوي ترڅو د Rupiah-Won LCT چوکاټ فعالیت ملاتړ وکړي.

د دې تړون سره، د اندونیزیا مرکزي بانک اوس د هند، مالیزیا، تایلینډ، جاپان، چین او سنګاپور په ګډون د یو شمیر نورو هیوادونو سره د LCT چوکاټ جوړ کړی دی.

اندونیزیا هم د نړۍ له یو شمېر هېوادونو سره یوځای په سوداګریزو راکړو ورکړو کې د ډالرو د انحصار د کمولو لپاره له ډېر وخت راهیسې اقدامات پیل کړي دي.

په حقیقت کې په هغو هیوادونو باندې چې د واشنګټن له سیاستونو څخه پیروي نه کوي، د امریکا له خوا د اقتصادي بندیزونو د لګولو ترڅنګ، د دې سبب شوي چې دغه هیوادونه په دوه اړخیزو سوداګریزو راکړو ورکړو کې له ملي اسعارو څخه کار واخلي.

د روسیې ولسمشر "ولادیمیر پوتین" مخکې اعلان کړی و چې د امریکا متحده ایالات د ډالرو وسلې په کارولو سره نړیوالې ماليې زیرمې بدنامې کړي دي.